Dubai khawpui chu an ramin Ukraine a rûn avanga khawthlang ramten an hrekna tlanchhiatsan nan Russian mi hausaten an hmang nasa hle.
Russian mi hausa tawntaw (billionaire) leh entrepreneur-te chuan United Arab Emirates (UAE) an thleng sup suop niin sumdawng pawl hruaitute chuan BBC an hrilh.
Russian-ten Dubai-a hmun leh thil (property) an lei chu 67% zetin kumin thla thum chhungin a pung niin sawi a ni.
UAE hi Russia hrek ve lotu leh Ukraine a rûn pawh sawisel ve lotu a ni.
Khawthlang ramten an hrek sup sup laiin Russian-te hnenah visa a pe thei reng bawk.
Thla hnih liam ta chhungin mi sang chuangin Russia hi an chhuahsan tawh a, a zat tak erawh hriat a ni lo.
Russian economist pakhat chuan indo tan atanga ni 10 lek chhungin Russian 2,00,000 chuangin an ram an chhuahsan hman niin a sawi.
Russian-te atanga dawrtu an ngah sawt em avangin Dubai-ah hian hma an lak theih nana company-te puitu, Virtuzone pawhin indin an tum mek.
Chief Executive George Hojeige chuan, “Indo a intan atang khan a let nga chuang zetin dawrtu Russian kan ngah a ni,” a ti.
“An ramah an sum leh pai dinhmun a hniam mai an hlauthawng a, hei hi helai hmuna an hausakna hum tuma an rawn kal chhan pawh a ni,” a ti.
Russian mi hausate hian villa leh apartment changkangte an lei nasa hle a. Real estate agent-te pawhin Dubai-a Russian lutten in an lei nasat em avangin man a to phah sawt niin an sawi.
Dubai-a hmunpui nei, real estate agency Betterhomes chuan Russian-in thil an lei chu kumin thla thum chhungin hmun thuma thena hmun hnih zetin a pung niin an sawi.
Real estate agency dang, Modern Living pawhin Russian dawrtu an ngah thar avangin Russian tawng thiam agent an rawih belh nasa tih an sawi a. Chief Executive Thiago Caldas chuan Russian mite hnen atangin Dubai-a in hmun lei nghal vut vut duha dawrtu an tam hle tih a sawi.
“A leitu Russian-te hian investment atan man an lei lo va, Dubai hi an in pahnihna atan hman an tum a ni,” a ti.
Mi mal hausa mai ni lovin, multinational company leh Russian start-up hrang hrangte chuan an hnathawkte chu UAE-ah an sawn lut nasa hle.
UAE hi China leh India nen chiah February thlaa United Nations Security Council-a Russia-in Ukraine a rûn demna tur vote laka dem lama tang lo an ni.