China ram laili, Changsha khawpuia in chhawng ruka sang chimah a chim atanga ni ruk liam hnuah chhanchhuah hna thawktuten damin hmeichhia an la chhuak leh.
An ram sanaa Nilaini zan zanlai pelh, Ningani zing (India sanaa Nilaini zan dar 10:30) vela an lak chhuah lai pawhin nikhua a la hria niin sorkar chanchinbute chuan an tar lang.
In chimah hian mi 10 dama lak chhuah an ni a, mi panga thiin mi dang eng emaw zat an chin hriat loh an la ni.
A chim chhui a nih mek laiin he in himna lama mawhphurtute man an awm nual tawh.
A himna lam derthawng, a sak dan a fel tawk lo leh tual chhung thuneituten an ei ru thin chu China-a in a chim leh chhan thin nia ngaih a ni.
Changsha-a in chima chhanchhuah hna thawktute hian an tih thin dan pangngaiin dam an la awm em tih dap nan au, thil tihrik leh ui fing an hmang a, drone an hmang bawk.
Ningani zinga an lak chhuah hi darkar 132 chuang in chim karah hian a lo tang tawh a ni.
In a chim atanga darkar 88 hnuah hmeichhe pakhat chhanchhuah a lo ni tawh bawk a, ani hian tui in tur a hmuh hlauh thu leh a tanna chu a lum that avanga thi lo niin a inngai.
Ani hi kum 21 mi niin in hnung lama in tepen dang, sumdawnna hmuna an hmana khum chungah a, tang a, kar kalta Zirtawpni chawhnu khan chhanchhuah a ni.
Chhawng lia sang a tla a; mahse, bang a chim vek loh avangin a intung kawkalh chuan kil thum nei ang deuhvin, chung neiin a inrem fuh hlauh niin Global Times chanchinbu chuan a tar lang.
Tui bel chanve a bul hnaiah a lo awm a, a daih rei loh a hlauh avangin vawi khatah lem khat lek lek chauhvin a in a. Mutbu a lo awm hlauh bawk avangin a intilum thei a ni.
A mobile phone chuan in a chim rualin signal a hloh nghal a; mahse, ni leh thla leh dar zat en nan a hmang tho va, a battery chu ren taka hmangin chhanchhuah a nih lai pawhin a la nung a ni.
A bul hnaia thil chang tak hmangin a bula bang chu a khawng ri thin a. “Pawn lam a bengchhen lai chuan ka khawng ri duh lo va; mahse, chhanchhuah hna thawktute an hnai nia ka hriat leh pawn lam a bengchhen loh laiin ka tiri reng a ni,” a ti.
‘Changsha girl’ tia an sawi zui tak mai hi China pumah a lar hle a, in chim hi an ramah chuan ngaihven a hlawh thin avangin social media platform Sina Weibo-ah an sawi zui nasa hle.
Chinese President Xi Jinping chuan chhanchhuah hna thawk zung zung tur leh a chim chhan pawh uluk taka chhui turin thu a pe.
Changsha in chimah hian mi pakua man an ni tawh a. Mi pali chu chhiatna thlen chhan bera ngaih niin mi panga erawh document dik lo an siam avangin hrem hmabak mek an ni bawk.