Mizoram Pradesh Congress Committee (MPCC) President Lalsawta chuan, “Congress party hi tlawmna nen kan kal tur a ni,” a ti.
Aizawl-a Congress Bhavan-ah nimina inkhawm, political session neihah MPCC President Lalsawta hian, “Congress party hi chapo taka kal tur kan ni lo a, tlawmna nen, mipui rawngbawltu kan nihna angin kan kal tur a ni. Congress party hruaitute leh member zawng zawngte chu khawi hmunah pawh dawhtheihna leh tlawmna nen kan nung tur a ni a, midang tana harsatna siamtu ni loin, tanpuitu kan ni zawk tur a ni,” a ti a; tlawmna nen politics khelh a ngaih thu a sawi.
Lalsawta hian kum 2021-a BJP Mizoram Pradesh vice president a nihna atanga bâng ta, Rev Dr LR Colney chu Congress party-ah a lawm lut nghal.
Congress party zawm thar, Rev Dr LR Colney pawhin thu sawiin, “Mizoram siam that duh vanga politics-a lut ka ni. Mizoramah CM atana tha tur kan inzawrhsiak mek a, Pu Lalsawta hi CM atana tha ber turah ka ngai. Mizoramin sum leh pai harsatna nasa tak a tawhna karah tha tak sum leh pai enkawl thiam, eirukna a fihlim Pu Lalsawta hi Mizoram mamawh chhanna a niin ka hria a, a fit ber ka ring bawk. Pu Lalsawta hi mi retheite tana innghahna tlak, Zofate tana Josefa buhzem siamtu tura Pathian ruatah ka ngai a ni,” a ti.
He hunah hian Rev. Dr. LR Colney bakah Congress party-ah hian mi thar paruk lawm luh an ni bawk.