MNF Adviser Robert Romawia Royte chuan Congress sorkar zu zawrh chhiah dehchhuah aiin MNF sorkar zu khap chunga chhiah sum a deh chhuah a tam zawk tih a sawi.
Nimina Mizo Hnam Run chhung inkhawm neihah Robert Romawia Royte hian, “Congress sorkarin zu an zawrh laia chhiah sum an dekchhuak hnem nia kan hriat ai khan, MNF sorkarin zu khap chunga chhiah sum kan dehchhuah hi a tam zawk fe a ni. Kum 2017-18 aiin kum 2019-20-ah ringawt khan cheng vbc 242 chuangin kan thawk chhuak hnem zawk a ni,” a ti.
Zu hi mi thiam thenkhatin revenue tha an tih fo chu a dik famkim lo tih sawiin, “State danga zu lak luh nan sum tam tak state dangah an luangchhuak a, state dangin tax leh thil dangah a hlawkna an lo tel daih zawk. Kan ramah zu kan siam loh avangin zu zawrh hlawkpuitute chu state dangte leh zu zuarte an ni ber,” a ti a, tax revenue pung sang ta hian hmasawnna hnathawh a tam hle a ni tih a tichiang niin a sawi.
Zu zawrh a nih lai ai khan MNF sorkar hnuah zu chhiah pawh la miah lo, Covid-19 tuar chunga MNF sorkar chhiah sum dehchhuah (tax revenue) chu kum 2021-22-ah chuan zu zawrh hun laia tax hmuh tam ber Rs. 424.92 aiin a letin a tam ta zawk, cheng vbc 894 chuang a nih thu a sawi a. “Kan CM zahawm tak, Pu Zoramthanga kaihhruai sorkarin zu zawrh kan titawp hi sum dehchhuah kawngah kan hlawkpui zawk a ni. Hei hian zu hi sorkar tan sum dehchhuahna tha ber a ni lo tih a tichiang,” Robert Romawia Royte-in a ti.
MNF adviser hian, “Congress sorkar laia leiba an neih tlem ber lai (2018)-a leiba GSDP Ratio kha 38.9 % a ni a, MNF sorkar hnu (2021) chuan leiba-GSDP Ratio chu 31.2 % a ni thung,” a ti a. Leiba-GSDP rate hniam chhan chu kawng tinrenga thawhchhuah tam vang leh sum dehchhuah (tax revenue) lama hmasawnna tam vangte a nih thu a sawi.
MNF-in a mala sorkarna an la neih ngai miah lohna MADC inthlanah Robert Romawia Royte hian hnen takin MNF-in sorkarna an chan a rin thu a sawi bawk.