Human resources development voard vice chairman L. Thangmawia’n “Mizoram leh khaw- velin a mamawh chu zirtirtu țha a ni” tiin, khawvel ram hrang hrang leh India ram ngeiah pawh zirtirtu tur an duh tui sawt hle tih a sawi.
District Institute of education and training (DIET) Aizawl train- ees union annual sport kharna AR lammuala nimina neih a hmanpuinaah he thu hi L Thangmawia chuan a sawi a. Trained lo tan zirtirtu a nih theih tawh loh thu leh College leh University-ah pawh doctorate degree neilo tan a luh theih loh thuai dawn tih a sawi.
L Thangmawia chuan DIET-a training mek te chu engtik hunah emaw Mizoram sorkar hnuaia zirtirtu an la nih ngei a duhsak thu sawiin, chutih hunah chuan sorkarin a dahna khua a piang ah zirlaite tana rawngbawlna rilru pua, ma- hni duhna hmun leh nuam tihna hmun aia zirlaite mamawhna zawn zawk thlira, Pa- thian rawngbawlna a nih anga khawi khua ah pawh awm thei tura an rilru an siam a pawimawh thu a sawi. “Khawpui lamin an mamawhna ang chiahin thingtlang lam pawhin zirtirtu țha an mamawh ve tho” a ti bawk.
Education minister Lalchhandama Ralte kaihhruai Human resource development board-in khaw te zawk khaw zali ah tal zirtirtu quarters sa thei turin kum 2019 ațang khan hma a la tih L Thangmawia chuan a sawi a. Chief minister leh planning board lam te pawhin theihtawpin buaipuisak zui mahse, Covid-19 avangin Central lama an dilnate a la hlawhtling thei rih lo nia sawiin, “Covid-19-in ziaawm lam a pan chhoha, he hmalak mekna a hlawhtling thei a nih chuan tuna zirtirtu, in luah tur pawh awm mumallohna khuaa thawkte tan a țangkai hle dawn a ni” a ti.
L Thangmawia chuan “Zirtirna hi a huna zirte, zirlaite azirtein zirlaibu pangngai rengah pawh tih dan tha zawk mahniin hmuhchhuah zel a ngai” a ti a. Chutiang tur chuan naupang chaklo zawkte, thiamthei zawkte zirtir dan pawh a inang diak diak thei lo tih sawiin, DIET-a training lai te chu an training course duh tawk mai lova, zirtirtu an nih hnuah pawh kumtina training anga inngaia, an naupangte khaichhuak tura inzir belh zel turin a chah bawk.