Zothan Autoworks Pro Volleyball League chu Zirtawpni zan atangin khelh tan a ni a. Inrinni zanah nen inkhel pahnih atangin Durtlang North leh Hunthar Veng in hnehna an chang.
Durtlang North in an chhang let
Kum 2019 final-ah Durtlang North in Chhinga Veng Spikers an hneh lova. Zirtawpni zana inkhelah an tlawmna an chhanglet.
R Dengthuama Indoor Stadium, Mualpuiah Haryana atanga an lak luh Sagar Malik chuan Durtlang North tanpuiin, Fabian Lallunghnema’n hnehna kawngah team a hruai bawk a, 25-22, 23-25, 17-25, 25-17, 15-13-in Spikers lakah an chak.
Sagar chuan point sarih a paih laiin 31 a thawk chhuak a, tlar hnunga a awm lai pawhin Durtlang North chhanhimtu berah a tang a, D3 Business Player of the Night lawmman dawng hmasa ber niin Kolasib spiker Fabian-an point 19 hmuin vawi ruk a tisual ve thung.
Kum 2019 khan Chhinga Veng in Pro Volleyball a vawikhatna atana champion turin Durtlang North an hneh a. Tun tumah bul tan fuhin set hmasa berah chan tha zawk chang hmasa mahse Karnataka atanga an lak luh Sujith Acharya a insiam rem nghal lo va, point a hloh hnem hle laiin Fabian-a leh Sagar chuan Durtlang North nawr kalin an lehpel.
Chhinga Veng tan Sujith chuan point 30 hmu mah se 19 a hloh a, captain Lallianmawia Pachuau chuan point 19 thawk chhuakin tum li chauh a tihsual. An pahnih bakah Spikers tan Nunpuia’n vawi 11 vaw tlain point li a hloh a, Ramengmawia’n point kua hmuin point thum a paih.
Chhinga Veng in team inkhairual zawk nei mahse Durtlang North tan point pawimawh leh boruak sangah Sagar leh Fabian-a an rin tlak a, intiat tawk tak chungin team pahnih inkarah danglamna an siam thei.
Kar leh thawhtanniah Chhinga Vengin an khel leh nghal dawn a, Mizo hlanga inlan tur awm chhun TNT an hmachhawn ang. May 11, nilaini zanah Durtlang North-in vawi hnih champion tawh Hunthar an khelhpui ve thung dawn.
Hunthar an fei zawk
Inrini zana inkhelah team pahnihte inchetthat chhawk mahse Hunthar Veng chu a tlo zawkah an tang a. Set thum set hnihin Tuichangral an hneh.
R Dengthuama Indoor Stadium, Mualpuiah vawi hnih champion tawh Huntharin inkhel thunun zo bik lo mah se hneh takin set hnuhnung ber an awpbet a, 25-19, 20-25, 25-23, 18-25, 15-6-in Tuichangral lakah an chak.
Inkhel hmuhnawmah hnehna chang turin a tawpah team inkhairual tha zawk an hlawhtling a. Hunthar in hnehna nen league bul an tan.
Set nganaah Laldensanga’n team fuih phurin lehlam an zuih ve thung a; a pum puiah Densanga point 15 hmuin vawi thum a tisual a, Gagan Kumar chuan point 30 thawk chhuakin 12 a hloh a, Hunthar tana hmu tam ber a ni.
Mi malin Tuichangral spiker Sahil-an point a hmu hnem ber a, 44 thawk chhuakin 16 a hloh a, D3 Business Player of the Night lawmman a dawng. A kawppui Saitea’n vawi 17 hlap thlain point li a hloh a, team chakpui zo lo mah se Pro Volleyball star thar a inlar.
Huntharin nilaini zanah Durtlang North an khelhpui leh dawn a, team pahnihin tha takin league bul an tan ve ve a, chak zawn zawk nih tumin an innuai ang.
Ningani zanah Tuichangralin a vawi hnih nan an khel ve thung ang a, an tlawmna chhang let nghal tumin TNT an hmachhawn dawn a ni.