Iran chhim lama rakzu siam a lo him loh avangin a intu mi 10 an thi tawh a, dinhmun hniam taka awm eng emaw zat an awm bawk.
Vaukama khawpui, Bandar Abbas-ah hian mipa pakua leh hmeichhia pakhat an thi tawh a, mi dang 19 chu damdawi inah enkawl mek niin an zinga pali chu an dinhmun a tha lo hle niin Hormozgan University of Medical Sciences thupuangtu, Fatemeh Nowruzian-i chuan Tasnim news website hnenah Pathianni khan a sawi.
Nowruzian hian mi dang 75 pawh damdawi inah hruai ngai an awm niin a sawi a, an zinga 45 hi dialysis tihsak niin pali chu an khaw hmuh a fiah lo niin a sawi.
Police chuan tun thla tirah khan zu him lo siam leh tidarhtua puh mi pariat an man thu an sawi a, heng mite in an dapnaah hian zu an sakna hmanruate pawh an hmu.
Iran-ah hian zu siam, hralh leh in hi khauh taka khap a ni a, sakhaw tenau thenkhat erawh phalsak an ni a. Dan bawhchhiate pawh na taka hrem theih an ni.
Zu him lo in avang hian tun hma pawhin khaw hmuh fiah lo leh an taksa peng chhe ta an lo awm fo tawh thin a ni.
Tun tuma mi bikah hian eng ang thil tha lo chiah nge zu-ah hian tel tih Nowruzian chuan a sawi lo va. Tun hma lama hetiang thil lo thleng tawhah chuan zu-ah hian mihringin a huat khawp methanol a lo tel tlangpui thin.
Tuiril khal tur venna te leh tuialhthei ang chia hman thin, methanol hi rawng nei lo leh rim pawh nei lo a ni a, zu satute hian an zu siam a tak zawk theih nan an telh thin a. A tam lutuk chuan taksa peng a tichhe thei a, mit delna leh thihna thlengin a thlen thei.
Kum 2020-a COVID hripui a len lai pawh khan Iran-ah hian zu tha lo in vangin mi an thi nasa hle a. Methanol tel tamna in avangin mi chuang an thi a, heng mite hi coronavirus that theitu nia ngaia intute an ni a, tam tak an mit a del phah bawk.