Aizawl: Dr Vanlaltanpuia, Chaiman MYC chuan Zirtawpni khan Shilong-a Mizo Zirlaite Inter-College Debate hun a hmanpui bakah mi pawimawhte kawmna hun a nei.
MYC chairman hian St Anthony’s College, Shillonga Mizo Student Union-in St Anthonys Mizo Department leh Mizoram Youth Commission nen tangkawpa debate, ‘Active participation of the youth in politics is necessary for the transformation of nation and society’ tih thupui hmanga St Anthony’s College Auditorium Shillong-a buatsaihah khuallian niin hun a hmanpui a, Shillong-a college hrang hrang pakua atanga Mizo zirlaite kalkhawm hmaah thu sawiin, zirlaite chu ram leh hnam tana theihtawp chhuah tur in a sawm a, Mizoram tana hlawhtlinna paw chhuak tur leh All India Services-ah lut thei tura bei turin a sawm a, zirna tluang panngai mai piah lama IIT leh IIM leh proffessional course hrang hrang a zir thei tura inchher hriam turin a fuih a ni.
Inter college debate-ah hian Shillong-a college pakua atangin inelna neih a ni a, speaker atan Pu B Lalruatpuia, Asst Prof. ICFAI, Aizawl hman a ni a. College ti tha ber, St Edmunds College niin pahnihna chu Union Christian College an ni a, pathumna chu St Dominic College an ni.
Best Debator-ah Samuel L Tlau St Edmunds College thlan ani a, Best Humorous Debator-ah Rammuanpuii, Womens College thlan a ni bawk.
Chawhnuah Indian Council of Cultural Research Regional Director, Dr Munish Singh nen Mizoram House-ah inhmuin Mizorama ICCR nen tangkawpa event kumin kumtawp lama buatsaih chungchangte an sawi dun a, Cultural Exchange Programme, Korean Cultural Exchange Centre New Delhi, MYC leh ICCR te nen tangkawpa buatsaihna tur a hmalak dan tur an sawi dun bawk.
Zan lamah NEC Secretary K. Moses Chalai, IAS leh L.Beimopha IRS, Deputy Secretary chu an pisaah hmuin NEC-in Covid-19 hripui leng avanga Reverse Migrant Workers te tana Skill Training buatsaihna tur a sum a pek avanga lawmthu hrilh pahin MYC mamawhte a thlen nghal a ni.
Mizoram Youth Commission chairman hi MYC Under Secretary-in a tawiawm a ni.