Kristian Thalai Pawl (KTP) General Conference vawi 59-na Kolasib, Diakkawn khelmuala May 5, 2022-a tan chu nizan khan a tiak ta.
May 7, 2022 (Inrinni) khan nilengin branch leh bial aiawha rorel palai tura ruatten ro an rel a, rorel tan hmain Kum 2022 atanga 2024 thlenga Central KTP hruaitu thar tur mi 25 thlan a ni.
Rorel inkhawmah hian kum 2026-a General Conference neihna atan Saitual an thlang a, kum 2023-24 kumpuan thupui tur chu ‘Tawngtai tam’ tih a ni a; kum 2022-23 chhunga thupui zir turin ‘Kohhran Humhalh Chungchang’ tih thlan a ni. Kum 2022-23 budget atan Rs 66,10,000 leh bial budget atan Rs 17,20,200 pawm a ni.
Agenda chhawp chhuah zingah Central KTP-in Youth Recreation Centre (YRC) a sak mek puala member tinin pawisa an thawh khawm thin chu titawpin, Central KTP-in bialah budget siam tawh an rel a; YRC leh hospital charity puala tum khata inkhawm thawhlawm lak khawm te an rel.
Bial panga atanga mahni anpui kawp (homosexuality) chungchanga hmalak rawtna chu kohhran hmalak mekna a nih avangin a hranpaa thutlukna siam a ni lo a, Myanmar raltlan chhawmdawlna pek rawtna pawh Synod hmalakna a nih avangin a hrana hmalak loh an rel.
KTP General Conference-ah hian Inrinni zan atangin Speaker Revd Chuauthuama’n thupui, ‘Tunlai thil awmzia’ (Rom 13:11) tih hmangin thuchah a sawi a, inkhawmpui tiak zan, Pathianni zanah Central KTP Leader kalchhuak, Rev. Vanlalmuanpuia Khiangte-in thuchah a sawi a; Synod Moderator Rev. Dr. Vanlalnghaka Ralte-in Central KTP hruaitu tharte hlanna hun a hmang.
KTP-ah pastor bial 216-ah branch 891 an awm a, chung zinga branch 45 chu Mizoram pawna mi a ni a. KTP member 1,57,830 awmin, mipa 97,542 leh hmeichhia 60,288 an ni.