- Zirsangkima
Nizàn Vàng!
Reiêk tlánga tlai ni tla tùr chu thlírin Christy chu a pindan tukverhah chuan a dâk vang vang a. Nichína ruah súr kha a báng fel tawh a; khua chu a thiang vûk tawh mai; thlifím a thaw seng seng a. Chù May thla tìr tlai ni tla tùr pawh chuan thing leh hnim hring nghelhte chu siam thar hlim ang sarin a rawn chhun tle no siau leh tawh a. Mahse, Christy thinlung chhúngah erawh chuan ruahthimpui thawk tùr thãwm te, ruahpui vànawn te, têk leh khawpui rîte chuan nasa takin ro a la rél reng thung!
Ni tla tùr thlíra dâk vang vang kan han ti tak nâ a, Christy chuan ní a tla dáwn tih pawh a hre ngût ang emaw chu! A rilru thawi dam a tum … han ti leh dáwn pawh ni ila, chutia tukverha thlifím dawng paha dâk chhuaka tlai ni tla tùr êng no mawi takina a thawi dam rual loha ná-in a thinlung chu a rûm si!
Nizàn lama thil thleng avàng khan a rilru chu a la ipik chun mai a. An picnic hãw, an in pan chhohna step a zawh chhoh laia step síra ngawi renga lo thu reng Muantea’n ‘then thutna thu’ a chhâk chhuah ri kha a ni, a rilru-a têk tla aia ringa la ri renga chu! A hmangaih ber Muantea chuan khawi lam dâwt thu a hriat tehrêng nge tih pawh a hriat loh vàngin a then fel dèr kha a ni a. Thu dik sawia thiam thu sawi ve hman pawh ni loin kut a thlâk titih hial a, a nam sawn dâwrh a nih kha!
Nimin mai a ni si!
Bangalore-a hna thawka awm ta Záma SMS an hmuh chuan Christy-te thianzaho chu an hlim kher mai. Záma chuan, ‘Aizawl ka lo hàw lai alãwm,’ tiin ama sum séngin Coconut Groove picnic spot-ah a thiante chu in-picnic-puiah a sáwm a ni. Picnic ní pawh chuan an kim khat fú; a hlim pawh an hlim viau hlawm—‘mahni ngaihzáwngte hruai awih loah’ an tih vàng pawh a ni maithei. Christy pawh chu a phùr viau a. A bialpa Muantea hnêna an thianzaho chauh an picnic tùr thu leh ngaihzáwng hruai ve an remtih loh thu a hrilh lai chuan ngaih that lohna rêng rêng a nei pha lo.
Záma leh Christy te hi an thian dangte aia inhre hmasa an ni a, a ngaih pawh an inngai bîk rêng a. Mahse, ngaihzáwng enin an inen ngai lo a, thian tha tak an nihna bâk chu an inkárah eng mah a awm ngai lo. Chumi ní pawh chuan an thian dangte hriat lêm lohin thla pawh an la dùn zing fú mai.
Hlim taka hun an hman hnu chuan thim thet thetah an hàw a. Christy pawh mi dang motor-a bet loin Záma bike-ah bawk a bet leh mai a. Tin, Záma chuan an in pan chhohna step bul thleng a thlah ta bawk rêng a.
A Mak A Ná!
A phone flashlight ti êngin an in panin step chu Christy chuan a zawh chho a. Thui a chhoh hma-in a aw hriat \han tak leh a ngaih ber âw-in, ‘Christy!’ tih ri chu a hre chiang kher mai. A phu zawk a—Muantea chu a hmù a, a phut zuk pawh a reh rualin a thlá chu a muang ta êm êm mai a. Va kuah tháwr a tum lai tak chuan Muantea tawngkam tenawm tak chuan a dinna ngaiah a dintír leh ta zâwk a—‘Tenawmnu!’ tia Muantea au thawt chuan!
‘Muante … eng nge?’ a ti hman tâwk—Christy chuan.
‘I phone khaw’ maw?’ tih pahin a ken èn vú vú a phone chu a phih thlâksak thuai a. A en a, a en mial mial a … ‘A chiang e, a chiang e!’ tih pahin Muantea chuan thenna thu kha tak chu a chhâk chhuak zui a.
‘Muante, eng nge?’ tia tap tuaua mai Christy chuan Muantea chu kuah a tum a. Muantea chuan Christy chu a nam sawn dâwrh a. A thu ngai tho, ‘Tenawmnu!’ ti nawn lehin a phone chu a pe zui a. E! A pe satliah lo—a hmaia nawr sawkin a ni a pêk ni!
‘Muante, eng nge thil awmzia?’ tia Christy tap thãwm leh Muantea bike ri chu inchhâwn tâwk tak an ni tawh!
Chumi zàn chuan Christy chuan Muantea chu phone a tum a, a la duh tawh lo. A SMS zawng zawngte chuan chhángtu an hmu tawh hek lo!
Kima Kiangah
A tih ngaihna hre lo lutuk chu Christy chu a tlaivár ta ngawt a. Muantea thianpa ber Kima phone tuma a number a dial chhin lai khan zíng dár thum a ri têp tawh ang chu! Chuti teh thuta Muantea’n a thenna chhan chu hria ni se, insawi thiam pawh ngai kher loin a zia deuh tùr. Mahse, tawngna hun pawh a pe duh lo achha chu a ni si kha!
An véng mai ni lo, Aizáwl tlangval luck, mi hausa fapa neih chhun, fel, smart, polite, nulate star rawn, a bialpa Muantea chu phú lo a inti thar leh êm êm mai a. ‘Muantea bialnu’ tia miten an sawi cháng paw’n, a làwmna leh a zahna a inzât thin. Mahse, Muantea hnênah chuan a thinlung a pe tawh a; tin, amah Muantea pawh a ta neih tawh bawk. Chu nèna inthen hlen chu a ngam thei lo a; a zuama zuam chi rual niin Christy chuan a hre thei lo a ni.
A tih ngaihna dang hre hek lo le, a tûkah chuan Muantea thianpa, mahnia in luah Kima chu a va pan ta rawih mai.
Khùr dur dur chungin Kima kawngká chu a va kik dawr dawr a nih kha. Kima chuan a rawn hawn thuai a, kimki cheihin Christy chuan a duh tak Muantea thianpa Kima chu a hma chhawn a. Thil awm dàn leh a hriat thiam loh thil awmzia chu a hriat thiam ang angin a’n sawi ve a—beisei nei rân chungin—tlêm hle mah se!
Amah Kima pawh chuan Christy kiangah chuan thup leh zêp neih tît têt a tum lêm lo—chutia manganga amah pantu a nih vàng pawh chu a ni ang e. ‘Záma nèn hian a ringhlel tlat che u a. A picnic huaihawtah i kal leh dáw dáw a,’ a lo ti teh vak a!
Chutah chuan Christy chuan Muantea’n a phone en a dìlna chhan leh a phone-a thlá an lâk dun a hmuh vànga a sat tùrzia chu a hre thiam ta chauh a.
Záma hnênah chuan ‘an nih lohzia’ hrilh tùr leh amah Muantea chu a engkim a nih thu te, amah Muantea a la hrilh ngam ngai loh, pasal hial atán pawha a thlanzia te chu mit tui far zur zur chungin a sawi ta hluam hluam a. Ngun takin Záma pawh chuan a lo ngaithla a.
Kima pawh chuan a thianpa Muantea hnêna lo hrilh tùrin a intiam zui zat a …
~
Chumi zàn chuan Christy chuan tlém a chhíng. Nghar muta mu ta fam chu ri hlekah a harh zêl a. A lukham síra a phone dah rawn rì ral ral chuan a kai tho chiang hle. A’n en a. Záma message a ni.
Záma chuan he hla hi a rawn thawn a …
Christ Tán
— MS Dawngliana Khiangte
Mahten chhùn ni ka hman laiin,
Khartung rawn sâwn e kan rúnah;
Chhàwn zai rélin pheilai ka khai e,
Lairil ti na tur mai a’n.
Kárah dâwt thu hràn vàngin maw,
Then zai i rèl tâk mai le!
Mahse, hei chauh hi ka ngèn a che,
Lám ang lêt zai rél leh la;
Ka thian, Christy tán.
A hai lo, a phú mawlh lo che,
Mahse e, han dáwn chiang ve la;
Sût leh hian i mawi tawh lul lo e,
In tiam biahthu di zawng kha.
Kumtluang rún hmun lêng dûn tùrin,
Lám ang lêt zai rél leh la e;
Báng hian ka ring nang ngaih vànga tap,
Kìr zai rél leh hrâm rawh aw.