Mizoram leh Tripura Zofate khua inkara tlan tur, ‘Hnam Inpumkhatna Bus Service’ hmasa ber (Aizawl leh Behliangchhip Inter-State Service) chu nimin khan Chief Minister Zoramthanga’n a vai liam.
Bus service tur vai liamna puala Tuikuala Transport Directorate kawta inkhawm buatsaihah Chief Minister Zoramthanga hian thu sawiin, Mizoram hualtu state dang leh ram danga Zofa chengte nen inpumkhatna a lo thuk zawk a, awlsam zawka intlawhpawh theihna turin lirthei service hi hmachhawp a nih thu leh inpumkhatna tha zawk neih theih nan hmalak mek a nih thu a sawi.
Hripui leng avanga tihhlawhtlin lawk theih loh hnuah Mizoram leh Tripura Zofate khua inkara bus service thei ta chu lawmawm a tih thu a sawi a. Khawthlang lam, Tripura panna kawng chu tha zawka siam a nih zel thu leh, Tripura sorkar pawhin an ram chinah hma an lak ve thu sawiin, “Helai kara bus leh lirthei dang service-te tan inkalpawhna nuam zawk an neiha awlsam lehzuala an service theih beisei a ni,” chief minister hian a ti.
Transport Minister TJ Lalnuntluanga pawhin hnam inpumkhatna chu sorkarin a ngaih pawimawh pakhat leh a thil tum a nih thu a sawi a. Ram leh hnamin hma a sawn theihna tura hmalakna chuan material infrastructure ringawt a huam loh thu te, hnam zahawmna leh inpumkhat tha neih tel a pawimawh thu te, hnam dang ngaihsanna leh mahni hnam nihna zahpuia sawi nepna hian hmasawnna tak tak a thlen loh thu te, hmasawnna tluantling nei tur chuan kan culture a innghat a hma sawn tum a ngaih thu a sawi.
“Hnam tlem tê kan ni a, kan hnam hi kan inpawh that a ngai zual hle a ni. Tuna bus service pawh hi chumi rilru pu chunga ruahman a ni a. Zofate kan inpumkhatna hi kan Zo hnam zahawmna leh ropuina a ni,” TJ Lalnuntluanga’n a ti.
‘Hnam inpumkhatna Bus’ hmasa ber vai liamnaah hian Dy. Speaker Er. Lalrinawma, Tourism Minister Robert Romawia Royte leh MLA Lalrinsanga Ralte, Ramthanmawia leh Zothantluanga te an tel bawk.
Hnam inpumkhatna Bus Service hi Aizawl leh Behliangchhip inkar tlan tur a ni a. A chuan man (bus ticket man) hi passenger pakhatah Rs. 476 a ni a. Thawhtanni leh Ningani zing dar 6 ah Aizawl atanga chhuak ang a, Thawhlehni leh Zirtawpni zing dar 6 ah Behliangchhip atanga chhuak thin tura ruahman a ni.