Colombia sorkar chuan mi sual rual hotupa, a chungthu rel tura United States-a an thawn duh lohna lantira a pawlten buaina siama car hal leh mipui an tihthaih tudai turin sipai leh police 2,000 rual a tirh belh.
President Iván Duque chuan Otoniel-a tia hriat bawk, Dairo Antonio Úsuga-a chu khawvela ruihhlo tawlhtu hlauhawm ber a nih thu a sawi.
Otoniel-a hi Gulf Clan cartel hotupa niin kar hmasa khan US-ah thawn a ni.
Hemi duh lo hian Gulf Clan chuan an ram hmar lamah ni li chhung tharum nena chetna (armed strike) an nei dawn tih an puang.
Gang member-te hian tharum nena an hotupa ram danga thawn chhuah duh lohna an lantirnaah Zirtawpni khan lirthei 100 vel an tichhia a. Civil mite pawh nasa taka tihthaihin pawn chhuak lo turin an ti.
Buaina awm mekna hmun hi an rama department 32 awm zinga pakuaah niin huam chhunga municipal 90 a huam niin thuneitute chuan an sawi a. Thi erawh an la awm lo.
Defence Minister Diego Molano chuan venhim hna thawktu mi 50,000 vel awm mek bak mi dang an thawn luh thu a sawi.
Otoniel-a hi kum sarih zet zawn a nih hnuah nikum October khan man niin thla hmasa khan Supreme Court chuan thawn chhuah hi a phalsak a ni.
Colombian thuneitute chuan Gulf Clan hian kum tin cocain tonne 180 atanga 200 inkar vel an tawlh thin niin an sawi.
Khawvela cocaine thawn chhuak tam ber, Colombia atanga ram danga thawn chhuah 30 atanga 60% vel hi an pawlin an thawn chhuah a ni.
President Duque chuan Otoniel-a hi Colombian drug lord Pablo Escobar-a nen a tehkhin hial a ni.
Man a nih lai khan Colombia-a mihring man duh ber lai niin sorkarin a lumanah $8,00,000 a chhiar a ni a. US phei chuan $ maktaduai 5 zet a lumanah hian a chhiar.
Gulf Clan hi province tam tak bakah ram dangah pawh an inzar pharh a. Ruihhlo tawlh bakah mihring pawh an tawlh a, dan lova rangkachak khur din leh mi pawisa chhuh luih an ching.
Member 1,800 chuang, ralthua keng an ni a, a tam ber hi far-right paramilitary group mi an ni a. Argentina, Brazil, Honduras, Peru leh Spain-ah te pawh an mite hi man an ni thin.
Colombia atanga US-a ruihhlo tawlhna kalkawng tam zawk an thunun a, Russia thleng pawhin an thawn a. US thuneitute chuan ‘ralthuam tha nena inthuam, tharum hmang nasa’ tiin an sawi.
Otoniel-a hi Colombia hmarthlang Antioquia province-a thingtlang khua, Panama nena an inrina bul lawkah sipai 500 leh helicopter 22 zet thawk chhuakin an man a. Dam chhung tang tura tih a ni.
Sorkar chuan a thachhangdawltu lawk zualte chin hrilh theih hnenah $ maktaduai 1.2 zet a phal mek a, heng mite hi ‘Siopas’ tih leh ‘Chiquito Malo’ tia hriat an ni.