Mizoram chhunga YMA branch hrang hrangte cricket hmanga an inelnaah final khel tur a chiang tawh a. Ramhlun Venglai Branch leh Durtlang Branch ten champion an inchuh dawn.
Suaka Cricket Ground-ah Thawhtanni khan semi-final khelh a ni a. Inkhel hmasa zawkah chungnung takin Ramhlun Venglai Branch an chak.
Hunthar Branch nen inkhelin Hunthar in vawm an thlang a. Ramhlun Venglai tan an opener pahnih – Hruaia (73) leh C. Vanlalhruaia (43(37) te inkawpin run 70 partnership neiin bul an tan a. Over 20 chhungin run 150 an siam.
Hunthar in over 15 chhungin run 64 bak an tlin lo thung a. Ramhlun Venglai bowler Lalrinfela Zadeng chuan wicket li a la a, over li a awm atangin run pe miah lova over khat vawm a n ei bawk.
Champion lai Ramhlun Venglai hian final vawi sarih an khelhna tur a ni a. Vawi li an champion tawh.
Inkhel hnuhnung zawkah team intluk tawk tak mai pahnih an intawng a. Wicket 3 in Durtlang Branch an chak.
Chaltlang Branch nena an inkhel a inhnehtawk hle a. Vawm thlang Durtlang in Chaltlang hi run 104 an siam tir a. Zothanzuala leh K. Vanlalruata ten wicket hnih ve ve an la.
Durtlang in an vuak tumin Lalhruaizela’n run 25 a siam chu hnehna an channa kawngah a tangkai hle a. Chaltlang bowler Lalramnunsiama chuan wicket 4 la in che tha ve tho mahse a tawpah erawh Durtlang dan zawh an ni lova. Over 19.1-ah an chak.
Final hi May 11, Nilaini chhun dar 11-ah Suaka Cricket Ground-ah khelh a ni ang.