Atletico Madrid in La Liga champion ni fel tawh Real Madrid an mikhual a. Tum dang aia Madrid derby boruak sang lo zawkah 1-0 in hnehna an chang.
Wanda Metropolitano a inkhelah La Liga title an chawi chian tawh avangin Carlo Ancelotti chuan a player chhawr rim zawkte a chawlhtir a. Heng zingah hian Karim Benzema, Thibaut Courtois leh Vinicius Junior te an tel.
First half tawp dawn lamah mualneitu lamin goal an khung a. Matheu Cunha chuan penalty a hlawhchhuak a. Yannick Carrasco chuan he penalty hi goal-ah a khung.
Atletico in second half-ah goal khung belhna remchang engemaw zat an nei a, mahse Coutois thlaktu Andriy Lunin chu Real Madrid tan a che tha hle.
Atleti goalkeeper Jan Oblak chuan, “Hnehna pawimawh a ni a, Madrid an champion fel tawh a, inthlak kual mahse an kheltha hle. Second half-ah kan khung belh lova, mahse vanneihthlak takin kan goal kan venghim a, goal khat kha chak nan a tawk.” a ti.
Ancelotti chuan, “Kan tum ber chu ni 28-ah squad dam kim neih a ni a, Karim a chau tawh a, a chawlh a ngai. Inhliam awm belh loh dan tur kawng kan zawng a, Luka Modric pawh a chau tawh a. Luka Jovic erawhin harsatna tenau a nei ve thung.” tiin player a chawlhtir a sawifiah.