Haitian mi sual rualte chuan khualzin bus-a a chuang mi 17 an ru bo va, tlanna sum phut vanga ti nia hriat a ni.
An ruk bo passenger zinga pasarih hi Turkish nia sawi an ni a, a dang pariat erawh Haitian niin a khalhtu hi Dominican Republic ram mi a ni thung.
Khualzin bus-a chuangte ruk bona hmun hi thla hmasa maia Dominican palai ruk bo a nihna hmun tho kha a ni a, an khawpui, Port-au-Prince dai mai a ni.
Ram palai hi ni li hnuah chhuah a ni.
Dominican chanchinbu, El Día chuan Turkish-te hi ‘missionary’ niin an tar lang a, Dominican Republic atanga Haiti rama lut niin an tar lang.
Haitia Turkish consul erawh chuan an ram mite chu ‘zirna lam chawi kan tum pawl’ an nih thu a sawi thung.
Haitian chanchinbute chuan 400 Mawozo gang an tih tamna, Croix-des Bouquets atanga ruk bo an ni tih an sawi.
Kum hnih liam ta atang khan Haiti-ah hian tlanna sum phuta mi ruk bo a tam sawt hle.
Nikum chhung khan mi 1,200 chuang ruk bo an ni a, an zinga mi 81 chu ram dang mi an ni tih Haiti-a Center for Analysis & Research on Human Rights chuan a tar lang.
Nikuma ram dang mi ruk bo zingah hian United States leh Canada ram atanga Kristian missionary 17 pawh an tel a. 400 Mawozo gang hian pakhat zel chhuah nan $ maktaduai 1 an phut a ni.
Missionary-te hi thla li zet an hren hnuah an zavaia chhuah an ni a, an phut angin tlanna sum hi pek an ni em tih erawh hriat a ni lo.
Haiti-a gang-te hian ram dang mi ruk bo hi an thiltihtheihna khawvel hriata pho chhuah leh tharum thawh an ching tih lantir nana an tih nia ngaih a ni.