Bialpa thar neih hi thil awlsam tak a ni lova, bialpa then phei hi chu a thawpik thlat thin ngawt mai! A ban che emaw i ban emaw pawh nise, hun engemaw chen in lo inzui tawh avangin a tlêm emaw a tam emaw chuan nâ i ti ve thovang.
Puite-i chu a bialpa-in a ban thut mai a, awmdan tur pawh a hre tawh lova, kal zel dan tur phei chu hla tak a ni! Engmah a hrethiam tawh lo.
Nun hi ho a ti a, atthlak a ti a, a indem ngawih ngawih.
A hna-ah a tui tawh lova, a thianthate’na an thlamuannate pawh chuan eng a ang lo. A thla telin a tuar a, mahse nikhat chu a tan beiseina kawl a lo eng ta tlat mai. Hrehawm a tih leh a tawrhna a reh nghal duak.
A TAWP A KHA
Hmangaihna lipuiah i cheng a, hun hlimawmin a hmuak che a, tudang i ngai lo. Nikhat chhung lek pawh i bialpa hi awm ta lo se… tihte phei chu i ngaihtuah ngai reng reng lo.
Tichuan zawi zawiin i lawn chho zel a, a chhip i thlen meuh chuan thawklehkhatah tek nasa tak a lo eng chuai chuai a.
I bialpa chuan inthen a rawt ta a le, khuanu ruat kan ni lo a tih meuh chuan, inthen chu kawng awmchhun a ni tawh mai. Thlaler ramro-ah vakvai mai i ni ta, khawnge tui hna thar awmna chu ni ta ang?
MUANGMAR ZAWKIN
Tunah chuan i nun chu pawhsawm ang maiin a darh nuai a. Hnemtu i ngai ngawih ngawih. I khawharna ruak huau mai chu hnawhkhah i duh nghal ang. Mahse, hmanhmawh duh suh.
Tuna i dinhmunah kha chuan level danga i kai hi a tha ber lo a ni. I hliam dam hun nghak ta che.
Kawmnuam leh nelawm tak nih tum hram hram la, thian siam tum ang che. Mahse, bialpa neih nghal thawt thawt tum suh.
Engtik lai pawha chhas neih reng hi ‘compulsory’ a ni love. Date pui tur zawn nghal rum rum loh hi i tih tur a ni.