UEFA Champions League atangin an tla a, mahse Manchester City in an Premier League lallukhum chu humhim ngei an tum hle. Pathianni zanah Newcastle United lakah chhanlet lohin goal nga an khung.
Etihad Stadium a inkhelah City in chungnung taka inkhel an thunun a, result an neih avangin point thumin hma an hruai fal.
Magpies tan Chris Wood chuan goal khung teuh hmasa zawk mahse minute 19-naah Raheem Sterling chuan City goal hmasa a khung a. Aymeric Laporte chuan khung belhin second half-ah Rodri leh Foden bakah Sterling bawkin goal a khung leh.
Inkhel zawhah Manchester City manager Pep Guardiola chuan title inchuh a intlansiakna chungchang sawiin, “He ramah hian tu pawhin Liverpool hi an tan a, mipui leh media lamah pawh a ni vek. Europe huapah chanchin ropui tak an nei a, Premier League-ah erawh an ropui lo. Kum 30 chhungin vawi khat chauh an champion.” a ti.
Inkhel dangah Arsenal in UEFA Champions League khelpha turin an dinhmun an ti nghet zel a. Leeds United lakah 2-1 in hnehna an chang.
Emirates Stadium-ah Arsenal tan striker rinrawl ni thar Eddie Nketiah chuan minute 5-na leh 10-naah goal a khung a. Tul lo taka foul avanga captain Luke Ayling hnawhchhuah a nih hnuah second half-ah Leeds in Diego Llorente hmangin goal an khung.