MADC inthlanah party mala sorkar zo an awm lo
|| BJP leh MNF-in sorkarna siam ngei an tum ve ve

May ni 5,2022-a Mara Autonomous District Council (MADC) hnuaia Member of district council (MDC) inthlanpui neiha vote tlate chu nimin khan chhiar a ni a, party mala sorkarna siam thei an awm lo a; BJP leh MNF-in sorkarna siam ngei an tum thung.
Bial 25 awmnaah hian party mala sorkarna siam turin bial 13-ah tal hnehna an chan a ngai a, hetihlai hian party mala sorkarna siam thei an awm lo a. MADC-a sorkar lai, BJP-in bial 12 lain, MNF-in bial kua, bial li-ah Congress an chak.
Bial riata candidate nei ZPM party-in chakna bial an nei lo a, independent candidate pali zingah thlan tlin an awm lo bawk.
Party malin sorkarna siam thei awm lo mah se party mala seat la tam ber, BJP party-in thawhpui neia sorkarna siam ngei an tum thu Mizoram BJP president Vanlalhmuaka’n The Zozam Times a hrilh.
Vanlalhmuaka chuan, “Seat kan lak zat hi central-a kan hotute kan hrilh tawh a, sorkarna siam ngei kan tum a, kan thawhpui tur chungchangah chaun kan hotuten ruahmanna an rawn siam ang,” a ti.
State-a sorkar lai, MDC seat kua latu, MNF party pawhin sorkar siam ngei an tum a, nimin khan MNF adviser, Minister of state Lalchhandama Ralte leh party hotuten Siaha an pan a. Party an thawhpui tur tak erawh an la sawi chiang thei lo niin MNF party hruaitu pakhatin The Zozam Times a hrilh.
MDC atana thlan tlin zingah hian mi 11 chu an tlin vawi khatna a ni a, mi 14 te chu MDC ni lai an ni.
Vote tlate hi Siaha DC office complex-a DRDA conference hall-a, counting hall pahnihah chhiar a ni a, zing dar 10 atanga chhiar tanin tlai dar 6 khan zawh fel a ni.

MDC thlan tlin tharte:

1. Tokolo – M Laikhaw (BJP)
2. Phura – H. Malvina (INC)
3. Vahia – K Chhuabei (BJP)
4. Laki – T Seido (BJP)
5. Zyhno – L Prisila (BJP)
6. Chapi – C. Chehnei (BJP)
7. Chakhei – K Hrahmo (BJP)
8. Siata – M Chiaidung (BJP)
9. Tisi – Tiahlei Syuhlo (BJP)
10. Tipa I – S Lalremthanga (MNF)
11. Tipa II – Beihu Nohro (BJP)
12. Laty – Beirahmi Syhly (BJP)
13. Saikao – Beihruakhai (MNF)
14. Amobyu – N. Zakhai (BJP)
15. Amotlah – HC. Lalmalsawma Zasai (MNF)
16. Noaotlah – Lalrosanga (MNF)
17. Chhaolo – MH. Tiabi (BJP)
18. Siaha North I – Nahlo Solo (MNF)
19. Siaha North II – M Manesia (MNF)
20. Siaha South I – J Beikiasa (MNF)
21. Siaha South II – N Viakhui (MNF)
22. Siaha East I – H Hrangchuanga (INC)
23. Siaha East II – HC Biakcheuva (MNF)
24. Siaha West I – James A Riatha (INC)
25. Siaha West II – ST. Vanmalsawmliana (INC)