Formula One world champion ni lai Max Verstappen-a’n a elpui Ferrari car khalhtu Charles Leclerc-a’n nasa taka a nawrna chu a veng tluan hram a. Miami Grand Prix hmasa berah a tlan chak ber.
Miami International Autodrome a intlansiakah hian Red Bull car khalhtu hian intlansiak tawp thleng harsatna lian lutuk nei lovin hma a hruai tluan dawn niin a lang hman a. Nimahsela lap tam a awm tawh lo tihah car intai palh avanga safety car tirhchhuah a nih chuan car inumte a hrut rual a. A tawp thlenga a hmahruaina hunhim turin a beih nasat a ngai zual hle.
Leclerc-a’n theihtawp chhuah mahse Verstappen a tang tluan a. World championship hmahruaitu ni mek Monagasque driver hian pahnihna a hauh a, point 19 in Verstappen-a lakah hma a hruai.
Red Bull hmasawnna a lang
Tun season Formula One tlan tan a nihin Ferrari in car an nei tha a, Red Bull nen an tha fal. Tunhnaiah Red Bull hian team ten an tih thin angin an car hmasawnna tur ‘upgrade’ an kalpui nual a. Round hmasa zawka Imola-ah pawh Ferrari tlan pelin hnehna an chang.
Miami khawlumah pawh Red Bull car a tlanchak a. RB18 tia hming an vuah car hi kawng ngilah a tlanchak a. Kual a tha zawka ngaih Ferrari nen pawh kualah an inthlau viau tawh lo.
Ferrari in season bul an tanna car chu an la ‘upgrade’ ve loh avangin car ngai an la hmang ang a ni a. Kawng ngilah Red Bull hi darkar khata kilometre 10 vela tlanchak zawk ang an ni a. A ngilah an inthlau thin.
Qualifying-ah Ferrari an che tha a, qualifying tlan thiam tak Charles Leclerc chuan pakhatna hauhin a hma ber atangin a tlan tan a, a teammate Carlos Sainz chuan dawtin Red Bull car te pathumna leh palina atangin an tlan chhuak.
Verstappen hi intlansiak tanin a tlanchhuak tha hle a, Sainz pelin pahnihnaah a chho nghal.
Leclerc um in kawng ngilah an intlanchak hleih avangin a hnaih telh telh a, in tlan pelhna hmanrua Drag Reduction System hman a theih hma atang pawhin Ferrari tan tan rei a harsa dawn tih a lang.
Red Bull car in tlankawng lum takah car tyre a ei na lo zawk bawk a, chan tha zawk telh telhin lap 9-naah Leclerc a lehpel.
Verstappen a fal telh telh a, Leclerc-a tan beisei tur a tlem hle. Nimahsela lap 41-naah McLaren khalhtu Lando Norris chuan Alpha Tauri driver Pierre Gasly a tai a. A car lakchhuah a ngaih avangin safety car tirhchhuah a ngai.
Safety car a tlan luh lehin lap 10 bak tlan tur a awm tawh lova, car zawng zawng an inhnaih leh tawh avangin Leclerc-a’n theihtawpin lap nga chhung Verstappen pelh a tum a. Mahse DRS nen pawh a ngilah Red Bull a pel hleithei lova, top speed sang zawk car chu um a harsat.
Midang result
Pathumnaah Carlos Sainz a tlan zova, Red Bull car khalhtu dang Sergio Perez chuan a pel mai dawn nia a lanlaiin a car ah harsatna a nei a, a car chakna a tlak hniam hnuah a pel thei tawh lo.
Car an neih that loh avangin season beisei pha lo tak hmang mek Mercedes team tan Miami tlankawng leh an car a inmil a. Tum danga harsatna an tawh angte chu awm lovin pangana leh parukna an hauh a. George Russell-a’n 12-na atang pangana a hauh a, intlansiak tan tir lamah a hard compound tyre a lum vat theih loh avangin 15-naah a tla thla hman.
Lewis Hamilton pawh parukna atang tanin parukna tho a hauh a, mahse a laihawl a inumnaah a che tha hle.
Free practice 3 a chesual Esteban Ocon chu a car chassis pum an thlak hlawk hnuah a hnung ber atanga tlan tanin 10-na a ni pha bawk.
Eng nge an sawi?
Pakhatna Verstappen chuan, “Intlansiak ropui tak a ni a, taksa pawh a heh hle. A tawp thleng khan a hmuhnawm ang. Ka tlan chhuak tha a, Charles-a car ke hma lam kha a ral chak deuh tih kan hriat khan kan dinhmun a tha zawk thei zui a, keini in medium compound kha kan hmang rei thei deuh a, kha kha a pawimawh.” a ti a.
Leclerc chuan, “Medium compound aiin hard compound kha kan car in a thatpui zawk a, a tawp lamah khan Max kha pelh theih ka inring hle. Mahse keini aiin vawiinah an tlan chak thei zawk a, hetiang han inum hi nuam kan tih tak chu a ni.” a ti ve bawk.