Mitthi vuina

  • Mahmuaka Chhakchhuak

Hnahthial BCM Bazar Pastor Bial Chairman Upa C. Lalthanpuia chuan hun lo taka min boralsan avangin a vuina hmuna telve turin tun Pathianni kal liamtaah khan zing dar 5;00 velah Lunglei chhuahsanin Hnahthial lam kan pan a. Tluang taka vuina hun hman a niin vuitu pawh kan thahnem hle a ni.

Mitthi vui danah hian kohhran hrang hrang tihdan alo in ang lo hle maiin insawisel ngawt erawh a tha bik chuang lo ang a, tuna Hnathiala kan mitthi vui dan erawh hmuhnawm ka tiin kan vui urhsun hle mai bawkin ka hria. In lamah thlahna hun hman a niin darkar hnih vel hun hman a ni a, chumi hnuah thlalakpui tur mi hrang hrangte’n thla an lakpuiin Biakin lamah vuina hun hman leh a ni. Hei hi kohhran upa a nih vang ni turah ka ngai deuh a, kohhran member zawng zawng chu hetianga an tih vek kher ka ring chiah lem lo a, tih vek sen pawh a ni kher lo ang. Upa C. Lalthanpuia erawh kohhran Upa a nih mai bakah Pastor bial Chairman tanglai a ni bawk a, Biakina vuina hun hman a ni hi awm ka tihpuiin inhmeh pawh ka ti hle mai a, vuituin alo thiam kher bawk nen chuan kan vui urhsun viau bawkin ka lo hria a.

Biakin chhung Lamtual lai takah Ruang chu kuang chhunga dahin pangpar nen mawi takin a hung a, Pulpit lam dawhsan chinah hian Pulpit hma lamah tualchhung kohhran upa leh tual upate zawng zawngin tlar hnihin Plastic Chair-ah thuin an vai mai chuan Coat dum an ha vek mai bawk a, khua lum hle mahsela necktie an awrh vek bawk a, thlir ringawt pawhin a mawiin a zahawm bawk hle a ni. Vuitu, Bialtu Pastor chu Pulpit-ah thuin chu hmun atang vek chuan inkhawm a kaihruai a. Hunserh tan a nihin Kohhran upa pakhat chu Pathianthu chhiar turin Pulpit lamah a ko chho a, a ni chuan thudang engmah nei loin Pathianthu chu a chhiar a, a chhiar zawhah chhuk lehin a thutna hmunah a thu leh a, chumi hnuah upa pakhat chu Pulpit lamah chho lehin Pathianthu a han chhiar leh a, a ni pawh chu a chhiar zawhah a thutna hmunah a thu leh mai a, chumi hnuah kohhran secretary-in mitthi chanchin chhiarna a nei leh a ni. Hemi hnuah hian vuitu Pastor-in rei vak lo leh ngaihthlak nuam takin thuchah a sawi leh a.

Zaipawl zai vawikhat ngaihthlak a ni bawkin kan zavaiin Pathian fakna leh chawimawina hla vawikhat sak a ni bawk a, hunserh hman zawh hnuin kohhran hruaitute chuan vawi li emaw hi thlalakpuina an nei lehin ruang chu Biakin atanga muangchanga zawn chhuah a niin thlanmual lam panpui nghal a ni. Ruang hi kohhran upate’n muangchangin an zawnchhuakin an hnungah midangin kan zui ve nghal bawk a. Biakina hun hman chhung hi darkar khat ai chuan a rei deuh hrat mai thei nain a ninawm hman loh a, chanvo nei mi hrang hrangin thunawi an nei lo bawk chuan hunserh chhungin mipui tan pawh ninawm tur engmah a awm lo a, mitthi vuina hmuna ka kal tawhna zawng zawngah kan la urhsun ber mai awm mange ka ti hial a ni.

Kohhran lam hi ka fak duh a, an inbuatsaihna a thain chanvo neite reng rengin an chanvo an hneh theuh hlawm a, a bik takin an rawngbawlpui an vui a, mimal tak pawhin an mi ngainat tak pawh a ni ngei ang. Chuvangin mimala sunna thu emaw uina thu emaw sawi an chak hlawm pawhin a rinawm. Nimahsela tumah chuan chutiang lam sawi loin an chanvo ang theuh chuan tha takin an hlen theuh a, belh leh paih tur awm chuang loin mawi tak leh zahawm takin hun an hmang theuh kha an fakawm ka ti hle a ni. Pastor ngei pawhin tawngkam chhehsual a nei miah lo te kha fakawm ka ti a, an rawngbawlpui hi a huntawp hmannaah hian an chawimawi thiam hlawm hle a ni. Tin, Biakina hun hman chhung hian naupang bengchheng engmah a awm loh mai bakah thawm bengchheng engmah a awm bawk lo te kha’n kan mi vui mek hi urhsun takin min vui tir a tihlohtheih loh bawk a, Sound lam fello a awm lote kha’n boruak a tih felfai phah ngawt mai.

Mitthi vui dan hi a in ang vek hauh lo ang a, a thenin Biakin chhunga ruang lakluh an lo duh loh laia Biakin chhung ngeia vuina hun hman duh pawh kan lo awm ang. Chulam chu sawi thui loin kohhran lam thu pawh a ni zawk turah ngai ila. Biakin a ni emaw Inah pawh vuina hun lo hmang pawh ni ila hetiang taka felfaia vuina hun hi hman theih zel hi nisela a duhawm a ni. Mitthi vui laia mitthi chhung lam tute emaw lo tap ngawk ngawk awmte hian boruak a tihdanglam theih thin avangin leh mit leh beng a lo tih kham theih thin zawk avangin inkhap hram hram thin pawh kan ngaiin insum hram pawh thil tha tak a ni a, vuina hun felfai leh mawi hnai taka hun hman theih hi kan zir zel pawh a pawimawh awm e.

A tawp berah chuan mitthi hi kan la invui zel dawn a, keimahni ngei pawh midangin min thlahliam hun alo la thleng ngei ang. Chutih hunah chuan tupawhin urhsun taka min thlahliam theihna atan hian kan damlai hun hman dan hian kawngro alo su thei dawn viau te hian a hriat. Khaw pakhata mi hausa chhungkaw thihna chungchang an sawi a, vuitu a neih mang loh thu an sawite leh khawhar inriak pawh an awm loh thu an sawi te ka hriatchhuah phahin chung mite tan chuan thihna chu mualphona a ni thei mai awm mang e. Tuna Hnahthiala kan vui liam tak erawhah chuan vuitu a nei thahnem hle mai a, nisa tak hnuaiah pawh thlantui zawih zawih chunga mi tam tak thu ka hmuh te khan mi namai a ni hauh lo tih ka hriat phahin kan mi sun hi mi hlu tak a nih zia min hriattir a, a hun tawp hmanna mah nisela ka chhuang hle a ni.

One thought on “Mitthi vuina

Leave a Reply

error: Content is protected !!