Mahindra & Ma-hindra chuan an SUV lar ber pawl Scorpio chhuan thar (new generation) model chu mipuiteah thawm rawn neih pui tanin mit ti vir tur tawk lek, a video tawi, ‘teaser’ an tichhuak tan ta!
Mahindra Scorpio thar tur hi a teaser video-ah hi chuan fiah takin an la phochhuak lo a. Thima a tlan zuai lai chauh a la lang thung a. Hmuh belh tur emaw tlema chiang zawk emaw a awm leh hun a nghahhlelhawm viau a. India ram mipui Scorpio SUV ngainatu leh a thar lo nghakhleltute an rawn ti phawklek nghal viau niin a lang.
Mahindra Scorpio thar tur hi a rawn chhuah har tawh loh a rinawm a. Kum khat chuang zet chu company hian hmun hrang hrangah khalh chhinin an endik tawh a. Hmun hrang hranga an khalhchhinna video hi internet-ah pawh hmuh tur a awm nual tawh a ni. Khawpui chhung leh highway bakah hmun chhengchhia leh sik leh sa danglamna hmun Himalaya tlang chhehvel thlenga an enchhinna video leh thlalak hi hmuh tur a awm tawh a. He SUV thar tur hi a nghahhlelhawm tawh hle a. SUV thar lei tur tan pawh nghah ngei chi a ni awm e.
Next Generation Scorpio
Mahindra hian an SUV hlun leh lar ber pawl Scorpio hi a design ngai hian an tichhuak rei tawh khawp mai a. Tunah hian a chhuan thar model, new generation model tihchhuah a hun tawh nia ngaiin a thar diaiin design leh kawng dang hrang hrangah an rawn tidanglam viau dawn niin a lang a ni.
Scorpio thar tur hi Mahindra lirtheia ladder frame hmang zinga a changkang ber pawl leh tha ber pawl a rawn ni chhunzawm leh dawn a. A design lamah chuan a hmaa mi aiin a danglam dawrh dawn a ni. A khawl lamah chuan tuna Mahindra Thar leh XUV700 ten an hman mek khawl ang ho, Mahindra khawl thar ho a rawn hman ve mai beisei a ni.
A teaser video-ah hian sawi tawh angin a lirthei landan tur lam an tilang lo a, hetihrual hian a hma bawr, headlamp leh DRL te a lang thung a. A headlight design thar tur a lang a, daytime running light (DRL) pawh hi LED a nih hmel a, a bumper-ah a awm thung dawn a ni. Mahindra Scorpio thar tur hian Scorpio hlui design nena danglam viau siin Scorpio a ni tih hriat theihna tur bo si lo design a nei dawn niin report thenkhat chuan an tarlang a. Mahindra Scorpio tih hriat tak si, design erawh thar leh mawi tak si a nih dawn hmel a ni. Mahindra Scorpio thar tur hi XUV700 in a rawn put hmasak ber hnuah Mahindra SUV ho logo bik putu pahnihna a nih ngei hmel.
A khawl lamah hian 2.0 petrol leh 2.2 litre diesel khawl te a hman beisei a ni a. Hengah te hian manual leh automatic gearbox tha tak a awm tel ngei hmel bawk a, a man to hoah Four Wheel Drive system a awm ngei beisei a ni bawk. Chanchin chiang lehzual hi Mahindra Scorpio thar turah hian kan hriat theih thuai beisei phawt ila.
Mahindra Scorpio
Mahindra Scorpio hmasa ber hi kum 2002-ah tihchhuah a ni a, hemi hnu hian kawng hrang hrangin tuaithar thin a ni a. Kum 2014 khan tuna a design hi a rawn pu leh ta a. Mahindra hian Scorpio thar hi tichhuak dawn mahse tuna chhuak mek ang design hi hralh a la kal em avangin report thenkhat chuan Mahindra-in an la hralhchhuah chhunzawm zel an beisei a ni.
Mahindra Scorpio thar hi reiloteah tlangzarh a nih beiseina a lian hle a. India ram chuan tun atanga rei vak loah SUV thar tha tak leh mawi tak a neih tawh beisei a ni a. A chanchin kan han tarlan tak aia chiang leh fish zawk te pawh kan hriat theih thuai tawh hmel a ni.