aIZAWL: National Institute of Electronics and Information Technology (NIELIT), Samagra Shiksha, Mizoram leh Mizoram IT Society te tangtlangin an buatsaih kar khat awh tur zirna lama thawktute IT lama intuaihriamna -Capacity building of school teachers on IECT technologies’ chu nimin khan Human resource development board vice chairman L.Thangmawia’n a hawng.
L Thangmawia chuan ICT hmanrua mamawh phuhruk nan Mizoram school hrang hranga hman turin smart class unit 1000 leh virtual class unit 2000 bunna atan sorkar laipuiah Rs vbc 154 dil a nih thu leh beiseina nen an nghah mek thu a sawi a. Khawvel ram hrang hrangte insingsak dan enin ICT chu zirnaah hman tam telh telh a ni dawn nia sawiin, “ICT tangkai zawka Mizoram zirnaa hman a nih theih nan zirtirtu leh office lama thawktute tan intuaihriam leh tanlak a ngai tawh hle a ni” a ti.
Zirna lama technology hmang tangkai tura hmalakna chu Mizoramah thil thar a nih loh thu leh hun rei tak kalta atanga SCERT-in a lo kalpui tawh a nih thu L Thangmawia chuan a sawi a. “Mizoramah zirna lama ICT hmang tangkai tura ke pen duh anga a chak tawk theih loh laiin kum 2020 kumtira Covid hripui lo leng chuan loh theihloha ICT hman ngei ngei ngaiin min siam a. He hripui hi rapthlak hle mahse, kawng leh lamah chuan ICT hman kawngah bung thar min kai tir thung a ni” a ti.
Covid hripui a reh hnuah pawh tangkai zawka hmang tura inpuahchah a tul thu sawiin, ICT tangkai taka hman theih a nih chuan Mizoram zirnain hmel thar a hmu dawn niin a sawi bawk.
Training hi zirtirtu 600 te tan batch 6-a kalpui tur niin, batch tinah zirtirtu 100 zel tan karkhat awh training neih zel a ni ang a. Batch hmasaber 9-13, May, 2022 ah neih a ni ang a, batch tawp ber tur a thawh rukna chu 18-22, July, 2022 a neih tura ruahman a ni.