Aizawl: Vawk pul hri African Swine Fever (ASF) thawh hnihna vanga Mizorama vawk thi chu 2,000 a chuang tawh a, Farkawn, Darlawn, Sakawrdai leh Champhai chhehvelin an tuar na hle.
Nimin khan ASF vangin Mizoramah vawk 75 an thih belh leh a, 532 suat a ni bawk.
Heti hian kumina ASF vanga vawk thi hi 2097 an tling tawh a, 1733 suat an ni tawh a, ASF nia rinhlelh vawk thi confirm si loh 503 a awm tawh bawk.
Kumina ASF leng hi Champhai District a Farkawn khua chuan an tuar nasa hle a, nimin khan Farkawn khuaah vawk 44 zet an thi leh a,tun dinhmunah vawk thi 388 leh suat 658 awm tawhin, kumina ASF vanga vawk thi leh suat hi sang khat leh 40 chuang a ni tawh.
Tunah hian vawk 2,000 chuang la awmin a thih belh zel avangin vawk vulhtute an mangang hle nia thudawn a ni.
Farkawn khua hian vawk an vulh hnem hle a, nikum kum tawp lam khan ASF hri leng vanga vawk lak luh leh hralh chhuah phal a nih hnu thla hnih chhung khan Nuai 300 lai an lalut a ni.
Farkawn khuaa vawksa rate Kg khat Rs 350-a chhutin kumina Farkawn khuaa vawk thi hi cheng nuai 200 a chuang tawh tih Farkawn khawtlang hruaituten an sawi.
Darlawnah pawh ASF avangin vawk 378 thiin 134 suat an ni tawh a, Sakawrdaiah vawk 300 dawn a thi tawh a, Champhai Zotlangah vawk 116 thi tawhin 82 suat a ni tawh.
Champhai vengtharah vawk 121 thi tawhin 103 suat a ni tawh a, Khawzawlah vawk 160 chuang thi tawhin 30 suat a ni tawh bawk.