IIT Guwahati chuan Assam state bakah India ram pawh chawimawiin QS World University rankings 2023 tihchhuah tharah ‘Research citations per faculty’ category-ah 41-na a hauh phak.
QS World University rankings 2023 hi Thawhtanni khan tihchhuah a ni a, IIT Guwahati hian nikum khan 56-na a ni phak.
IIT Guwahati hi category pakhata a dinhmun a san bakah hian zirna leh research institute hriat hlawh tak hi a pum puiah No. 395-na a ni phak bawk.
A pum pui dinhmunah hian dinhmun 75 zetin hma a sawn a, nikum kha chuan 470-na a ni.
A dinhmun a kân chhan hi ‘citations per faculty’ category-a a dinhmun a kân tak vang a ni ber a. Nikum khan 77.9 a score laiin kuminah hian 94.8 lai a score phak tawh tih IIT Guwahati chuan an thuchhuahah an tar lang.
IIT Guwahati director Prof. TG Sitharam chuan, “Hripui leng karah heti taka hmasawnna awmah hian faculty, zirlai leh thawktute ka lawmpui a, khawvel huapa invawrh chhuak turin rim taka thawh a ni tih a tichiang a ni,” a ti.
“Institute hi Research Citations per Faculty-ah hma a sawn nasa em em a, hei hi a pum puiah pawh dinhmun sanga kan din theihna bul a ni a. Academic Reputation pawh kan dinhmun sanna pakhat a ni bawk,” tiin IIT Guwahati director chuan a sawi.
Prof. Parameswar K. Iyer, public relations, branding & ranking-a dean chuan kum tam tak hma an lo lak tawhna chuan rah a chhuah tih a sawi.