Mara Autonomous District Council (MADC) inthlanpui neih zawh takah party mala sorkarna siam thei tur an awm lo a, thawhhona sorkar a pian theih nan pawimawh tak, MDC pali nei, Congress party-in MNF leh BJP thawhpui an tum loh thu an puang.
Bial 25 awmna, MADC inthlanpui neih zawh takah khan seat la tam ber, BJP-in seat 12 an la a, party malin sorkarna an siam thei lo a, MNF party-in seat kua lain sorkarna siam turin MDC pali tal thawhpui an neih a ngai bawk.
Sorkarna siam tura MDC atana thlan tlinte an inhelna karah MDC pali nei, Congress party-a thuneitu sang, Political Affairs Committee (PAC) chuan MADC-a sorkarna siam turin BJP emaw, MNF emaw thawhpui lo turin thutlukna a siam thung.
Congress party thutlukna hi Mizoram Pradesh Congress Committee-a treasurer, Zodintluanga Ralte, MLA chuan nimin khan Siahaah chanchinbumite hmaah a puang a, mipuiten Congress party seat li an pe chu lawmawm a tih thu a sawi a, hetihlai hian PAC-in thutlukna a siam angin eng party mah thawhpui an tum ta lo tih a sawi.
Congress hruaitu dang, MDCC President S. Hiato leh MPCC General Secretary Zothangliana te pawhin BJP chu sorkar laipuiah an khingpui lian ber a nih vangin thawhpui a rem lo tih leh MNF pawh state-ah an khingpui ber a ni a, thawhpui an rem lo tih an sawi.
MADC-ah sorkar siam thei tur a la chian loh lai hian seat la tam ber, BJP party-in sorkar siam an tum thu leh sorkarna siam thei tura an mamawh MDC pakhat nei turin hma an lak mek thu BJP Mizoram state President Vanlalhmuaka chuan The Zozam Times a hrilh.
MDC pakua nei, MNF party pawhin sorkarna siam ngei tumin hma an la mek niin Siaha atanga thudawnna chuan a sawi a, sorkar siam tur hian party thawhpui an neih dawn leh dawn loh chungchangah erawh thutlukna mumal an la nei lo niin a sawi bawk.