National Family Health Survey (NFHS)-in Thawhlehnia report tihchhuahah chuan India rama chhungkaw zinga 19.4% zet chuan inthiarna mumal an hmang lo tih tar lan a ni.
“Chhungkaw 19% chuangin inthiarna an nei lo va, chumi awmzia chu pawnlerah an inthiar tihna a ni,” tiin report-ah hian tar lan a ni.
Khawpuiah chuan pawnlera inthiar hi chhungkaw 6.1% an ni a, thingtlang lamah phei chuan 25.9% zet a tling.
State leh union territory zingah inthiarna nei lo hi Bihar-ah an tam ber a, chhungkaw zinga 61.2% zet pawnlerah an la inthiar a. Jharkhand (69.6%) leh Odisha (71.3%) ten an dawt.
Lakshadweep-ah erawh chuan chhung tinin inthiarna an nei a, Mizoramah pawh 99.9% leh Kerala-ah 99.8%-in an nei bawk.
Report-ah hian hmasawnna erawh hmuh tur a awm thung a. 2015-16 chhunga pawnlera inthiar chhungkaw 39% zet la awm chu 2019-2021 chhungin 19.4%-ah a tlahniam tawh a ni.
NFHS-a tar lan a nih dan chhung chhungkaw zinga 69.3% chuan an inthiarna an tichangtlung a, hei hi chhungkaw dang nena intawm lo tihna a ni a. 8.4% erawh chuan an la intawm a, 2.9% chuan hmasawnna an nei lem lo.
Khawpuia cheng chhungkua zinga 80.7% chuan inthiarna changkang an hmang a, thingtlangah erawh 63.6%-in an hmang phak a. Inthiarna intawm zingah khawpuia chhungkaw 10.5% chuan a tha chi hmangin thingtlangah 7.4%-in an hmang thung.
Prime Minister Narendra Modi chuan kum 2019 khan Mahatma Gandhi piancham kum 150-na pualin India thingtlangte chu pawnlera inthiar awm lohnaah a puang a, hei hi kum 2014-a an sorkar tirha Swachh Bharat scheme an kalpui hun tiam tawp a ni.