India-in Britain awpna laka zalenna a siam hmasak ber, First War of Independence 1857 an tiha India tana beitu sipai 282-te ruhro chu Amritsar bula thil an laihnaah an lai chhuak niin Dr JS Sehrawat, Assistant Professor, Dept Anthropology, Punjab University chuan a sawi.
Heng sipaite hi an sakhuain a duh loh tak, an silai tel atana British-hovin vawksa leh bawngsa tel an hmantir avanga helte an ni.
“Heng ruhro kan hmuhte hi kum 1857-a British-te laka zalenna duha beitu Indian sipai 282-te ruh kha a ni a. Punjab khawpui, Amritsar kianga Ajnala an tiha sakhaw hmun pakhat hnuaia khur atanga hmuh chhuah a ni,” tiin assistant professor chuan a sawi.
“Sipaite hi an silai kartuta vawksa leh bawngsa tel hmang tura tih an nih avanga helte kha niin zirnaah chuan a lang a. Pawisa thir, medals, DNA zirna, elemental analysis, anthropological, radio-carbon dating leh a danga teh pawhin chu lam chu a hawi vek a ni,” tiin Sehrawat chuan a sawi bawk.
1857 revolt an tih kha First War of Independence tiin hmanlai chanchin ziaktute chuan an sawi mai thin a. British Indian Army-a tang Indian sipai tam tak chu an sakhaw rin dan kalha vawksa leh bawngsa tel hmang tura tih an nih avangin an hel a ni.