Palestinian-American chanchinbumi, Al Jazeera tana thawk chu Israeli sipaiten West Bank-a Jenin-a mi an luhchhuahnaah an that.
Qatar-a hmunpui nei network hian kum 51 mi, Sherine Abu Aqla-i hi sipaite hian lainatna nei miah lovin tum rengin an kap niin an sawi a. A producer pawh kapin hliam na tak a tuar niin an sawi bawk.
Israel prime minister chuan Palestinian silai kengte nen an inan em avangin an inkah tawnnaah an inkap palh a nih hmel niin a sawi thung.
Chanchinbumi kah hlum hi tun hnaia Israel leh Palestinian-te inkara tharum thawhna a thlen a tam mek laia thleng a ni.
Palestinian president chuan ‘dan bawhchhiaa tihhlumna’ tia a sawiah hian Israeli sorkar chu a mawhphurtu a nih thu a sawi.
Israeli sipaite chuan Nilaini zing hma takah khan venhim hna thawktu dangte nen mi firfiak nia rin dapin Jenin refugee camp an luhchilh tih an sawi.
“Hetih lai hian Palestinian silai keng sawm rual zetin an lo kap a, puak thei dangin an lo bei bawk a. Sipaite hian an chhanglet ve a, ani pawh a lo fuh a ni,” an ti.
Palestinian health ministry chuan Sherine Abu Aqla-i hi mi luhchhuahna a hmuna a awmchilh laiin a lu-ah kah a ni tih a sawi a. Damdawi inah hliam na tak tuar chunga lak niin a hnuah a thi tih puan a ni.
Palestinian chanchinbumi dang, Al Jazeera producer Ali Samoudi pawh a hnungah kah niin ani erawh a dinhmun a tha niin health ministry chuan a sawi.
“Israeli army beipui thlak lai thla lak tuma kan thawk chhuak chu kalsawn tur leh thla la lo tura tihna pawh awm hmasa lovin min rawn kap thut a ni,” tiin Samoudi hian a sawi niin Al Jazeera chuan a tar lang.
“Silaimu hmasa zawkin min fuh a, a pahnihnain Sherine-i a fuh a. Heng lai hmunah hian Palestinian sipai chenna pawh a awm lo,” a ti.
Abu Aqla-i hi Al Jazeera correspondent hlun tak niin a hmun ngeia kala Israeli-Palestinian buaina chungchang kum tam tak chhung a tihchhuah thin avanga hriat hlawh a ni.
Israeli sipaite hian tun hnaiah Jenin refugee camp-ah hian mi an luhchhuah nasa hle a. Hei hi tun hnaia an ram chhunga Israeli Arab leh Palestinian-ten mi an beih fona thleng thin chhuia a titute an luhchhuahna a ni.
Israel leh West Bank-a tun hnaia mi beihna thlengah hian Israeli 17 leh Ukrainian pahnih an thi tawh.
Sipaiten a titute chhuia an luhchhuahnaah Palestinian 26 an thi tawh bawk.
Israel-in beihpui a thlakna hi Jenin district a ni tlangpui a, Israel-a beihna thlentu Palestinian pali chu he hmuna mite hi an ni.