Barcelona in La Liga-ah pahnihna dinhmun an chelh lai chu nghet zawkin an chelh a. Thawhlehni zana inkhelah Celta Vigo 3-1 in an hneh.
Camp Nou a inkhelah Barca tan January thla a an lakluh Pierre-Emerick Aubameyang bawk a che tha leh a. Halftime hma leh hnuah goal khat ve ve a khung a, La Liga-ah goal 11 a khung tawh.
French winger Ousmane Dembele pawh par vul lehin Memphis Depay goal khung tur a siamsak hnuah Aubameyang a goal khung tur a siamsak leh bawk a. Dinglam kilah ven hleihtheih a ni lo.
Season tawp a contract hmang zo tur Dembele hian La Liga-ah tun season-ah assist 13 a nei a. Inhliam avangin match 16 khel lo chungin a dam chuan Barca tan a langsar thei hle.
Barca coach Xavi chuan, “Pahnihna nih a Supercopa khel tura tlin hi kan tan chona a tling a, pahnihna hauh hi sum lamah pawh kan tana tha a ni. Vawiina kan inkhel erawh kha aia tha zawk khan kan khel thei a, nidangah vawiin letling chiah hi kan chungah a thleng ve thin tho. Kan khelhthat ni a result tha neih loh kan nei a, vawiinah result tha kan nei hlauh a ni.” a ti.