Aizawl: School Education Department Director Dr H Lalthlangliana chuan, “Mizoram-ah sorkar sikulten Mission sikulte an phak loh thin chhan ber chu Mission sikula thawkten missionary rilru pu-a hna an thawh thin vang a ni pakhat,” a ti.
Serchhip-a School Education Department pisa leh zirna in hrang hrangte Thawhlehni khan Dr H Lalthlangliana hian a tlawh a. Serchhip BRC Hall-ah zirtirtute leh zirtirtu pawl hruaitu kalkhawmte hmaah thu a sawi a. Sorkar sikulten Mission sikulte an phak loh thin chhan pakhat chu thawktuten missionary rilru pua hna an thawh thin vang a nih thu sawiin, hei vang hian sorkar sikula thawk zirtirtu chu missionary rilru leh neitu thinlung pu chunga thawk turin leh, sorkar hna an thawhnaah anmahni lungawina khawpa hna thawk turin a chah.
Dr H Lalthlangliana hian an dinhmun thlirin sum leh pai awlsam hun a awm tak tak dawn lo tih sawiin, hei vang hian sorkarin a tihsak theih aia anmahni tihtheih lam ngaihtuah thin turin he huna tel zirtirtute chu a chah a. Sorkar hnathawk tan a theih dan hram zawn thin a pawimawh thu sawiin, naupangte enkawl dan ah pawh a theih dan hram zawn chu hnathawh dan phung ah nei turin a chah bawk.
School Education Department director hian zirtirtuten ACR chungchanga harsatna an tawh thin chu sutkian tuma hma an lak thu pawh a sawi a. Kumin March 31 atanga chhiara kum nga kalta chhung a mi kha tihfel tum a nih thu leh, hemi atan hian zirna in hrang hranga hotute chu an staff-te ACR thehlut tura lo hriattir turin a chah bawk a ni.
He hunah hian zirtirtu pawl hrang hrang aiawhte chuan harsatna leh rawtna an neihte education director hnenah hian thlenin inkawmna hun an hmang zui bawk a ni.