Mizorama sedan huanga lirthei kan hmuh zingah chuan tun dinhmuna a lar ber pawl tih theih Hyundai midsize sedan lar tak Verna chu a chhuan thar (next generation) model tichhuak turin Hyundai chuan hma a la leh mek a, tunah hian khawlaia an enchhin lai hmuh tur a awm leh ta.
Next generation Hyundai Verna, a codename atana BN7 an tih chu India ram chhim lamah ramchhunga a hmasa ber atan an enchhin lai hmuh tur a awm leh ta a. An company hmunpui awmna South Korea-a an enchhin lai chu hmuhtur a lo awm tawh bawk a ni.
Design
Hyundai Verna thar tur an enchhinna lirthei te hi uluk taka miin an la hriat lohna tur leh a lirthei design tur a darh loh nan tuam chhuah vek (camouflage) a ni a. Hetihrual hian thil hrang hrang lo hriat lawk theih a awm tho a. Hyundai lirthei thar hoa kan hmuh an company design thar ‘Sensuous Sportiness’ kan tih chu kan hmu dawn niin a lang a. Hei hi rampawna Hyundai Elantra leh Sonata-ah te pawh kan lo hmu tawh a. Ramchhungah chuan Hyundai i20-ah te kan lo hmu tawh bawk a ni.
Hyundai Verna thar turah hian grille hlai tha tak, a headlamp nena inzawm a nei dawn niin a lang a, hei bakah hian tunlai lirtheia kan hmuh tam em em split headlamp design pawh a rawn nei dawn bawk a ni. A hnunglamah chuan a taillamp te hi Elantra thara mi ang deuhin angular design kan hmu dawn a. Hyundai Verna thar tur hi tuna chhuak mek ai hian a lian hret dawn bawk a ni.
A chhung
A chhunglamah chuan dashboard design thar hlak a nei ang a, hei bakah hian a chhung pawh a zau deuh tura beisei a ni a. A thil kentel hrang hrang tura beisei te hi sunroof, LED headlamp, seat tihvawh theih (cooled seat), i20-a kan hmuh ang 10.25 inch touchscreen infotainment system leh full-digital instrument cluster te kan hmuh hmel bawk a ni. A kentel leh design hrang hrang te pawh hi hriatkim a la har em em a, kimchang zawkin kan hre chho telh telh turah beisei ila.
A khawl
A khawl lamah chuan tuna a hman mek ang – 1.5-litre petrol leh 1.5-litre turbo-diesel te a la hman chhunzawm hmel a. Heng khawlah te hian mild hybrid technology bakah automatic start/stop leh brake-energy regeneration te kan hmuh hmel bawk, hei hi lirthei himna lama inkhuahkhirhna thar ber CAFE norms an tih a zawm theihna tura a kentel tul te an ni. Mild hybrid system thatna pakhat chu a tui (petrol/diesel) a ti heh lo sawt dawn hi a ni a. Heti anih chuan a elpui tur Maruti Suzuki Ciaz leh tunhnaia tlangzarh thar Honda City hybrid te pawh market-ah Hyundai tan inelpui a nuam lehzual dawn a ni.
Hyundai Verna thar turah hian turbocharged petrol khawl te deuh duhthlan tur a rawn awm thar maithei bawk a ni. Transmission lam pawh a ngai a la nih a rinawm a. Gear box ngai a la hman hmel a, heng khawl kan tarlanah te hian manual leh automatic gearbox te a awm dawn a ni.
India-ah engtikah nge?
Hyundai Verna thar tur hi khawvel huap chuan kuminah tlangzarh hman beisei a ni a. Heti a nih chuan India ramah chuan nakumah kan hmuh ve nghal a beiseiawm a, nakum January thlaa Auto Expo 2023- neih leh turah pawh an phochhuah tel ngei a rinawm a ni. Hyundai Verna hi a midsize sedan pui dang – Skoda Slavia, Honda City, Maruti Suzuki Ciaz leh lo chhuak mai tur Volkswagen Virtus te nen market-ah chuan an inel dawn a ni.