Aizawl : DIET Serchhipa training mek 2nd & 4th Semester-te hmawr bawkna atana inelna ni thum awh neih chu nimin khan khar a ni. A pual inkhawmah Serchhip Dist MJA President C.Lalhminghlua’n khuallian niin a hmanpui.
Serchhip Chanmari vengthar-a DIET Conf. hall kharna hun hmaah khuallian C Lalhminghlua chuan thu sawiin, tunlai khawvel chu tharum ni lo thluak hmanga eizawnna a nih tawh avangin, chuta tan chuan zirna chu a pawimawh ber a ni tih a sawi a. “Lehkhathiam lo chuan mi hriat ang hre lo leh mi phak tawk lohna neia an inhriat avangin mahni inrintawkna an tla chham a ni,” a ti.
C Lalhminghluia chuan, midangte finna pe thei tura thawk zirtirtu te chu an ropui a, an ropuina chu an hlawh tam lamah leh an in leh lo that lamah a innghah loh thu a sawi a. Naupang an zirtirnaah tawngkama an zirtir bak an nun thlengin zirlai te’n zirtirtu te chu an chikin an zir tel avangin, an file chu lehkha ni loin mihring a nih thu leh nun uluk a tul bik tih a sawi.
Tun hma ata tawh zirtirtu chu kohhran leh khawtlang hruaitu an ni thin a, tunlai hian chu hmingthatna chu zirtirtu tam takin an hloh mek nia a hriat thu leh ram leh khawtlang nun siamtha tura ngaihtuahna hmang a, hlawh aia zirlaite dah pawimawh ramin a mamawh thu a sawi a. DIET a Pre-Service training mek te chu an zir chhuah hunah zirtirtu hna hmua tha tak leh entawntlak thawktu ni ngei turin duhsakna a hlan nghal a ni.
He hun hi Lalrammawi, Principal, DIET in a kaihruai a ni.
Serchhip District Institute of Education and Training hi kum 2006 khan Mini DIET tia din a ni a, kum 2013 khan DIET puitlingah hlan kai niin, tun hmaa zirtirtu ni mek te training an pek thin chu kum 2016 atang khan zirtirtu la ni lo, ni tura inbuatsaih te Pre-Service training pe thei a siam a ni leh a ni. Training course khat hi kum hnih niin tun tum training nei mek te hi course thumna a ni a, course khata training te hi mi 100 bawr vel an ni thin a, tuna training mek te hi mi 93 an ni.