Bayern Munich striker Robert Lewandowski chuan Inrinni khan German champion lai hnenah contract thar a ziah belh tawh dawn loh thu a sawi.
Poland international hi tunhnaiah Allianz Arena chhuahsan tur anga sawi thawm a tam hle a. Kum 2023 thleng contract a la neih chu hman zawh hnuah chhuah a tum tih a nemnghet.
“Hasan Salihamidzic nen kan inbia a, ka thutlukna hi ka hrilh tawh. FC Bayern-ah contract ka ziah belh tawh dawn lo.”
“Club leh keimah pawhin kan hma hun kan thlir a ngai a, hei vang hian kan pahnih tana tha ber tur ve ve kan zawn hi a ngai.”
“Club in keimah lalut tura dawrna a dawng a nih chuan kan ngaihtuah tlan chu a that ber tur thu ka sawi tawh a, hmalam kan thlir a ngai a ni.” tiin Lewandowski chuan a sawi.
Bayern director of football Hasan Salihamidzic chuan, “Lewa nen kan inbia a, contract kan zawrh a pawm loh tur thu min hrilh. Boruak dang hip a duh a, chhuah a duh. Mahse keini lam dinna erawh a la ngai a, June 30, 2023 thleng contract a nei a, hei hi a danglam dawn lo.” a ti.
Spanish club Barcelona leh Lewandowski te hi sawizawm an ni fova, a kal ang em tih erawh hriat a la ni lo.
Blaugrana hian sum lama harsatna an la tawh avangin Lewandowski an lalut dawn a nih chuan an squad an siksawi a ngai leh dawn a. Hetihlai hian Bayern hralh an phal ang em tih a hriat loh bawk.