Serie A champion nih inchuhna chu season khar ni ah chinfel a ni dawn a. AC Milan in champion an hnaih tawh hle laiin Inter Milan in hnehna changin an hmelmate an la nghah tir.
Unipol Domus ah Inter Milan an leng lut a, Argentina striker Lautaro Martinez chuan goal hnih khungin 3-1 in Cagliari lakah hnehna an chang.
Inter in champion tura beiseina tinung turin chak ngei an mamawh a, minute 25-naah Matteo Darmian hmangin goal an khung a, hei hi Martinez-a’n second half tan tirah chhunzawmin Cagliari tan Charalampos Lykogiannis chuan goal khat khung mahse Martinez bawkin hnehna a tichiang.
Inter coach Simone Inzaghi chuan, “Nilaini khan minute 120 kan inkhelh avangin kan inkhel leh kan result-ah ka lawm hle. A umtu zawkah kan tang a, kan chak a Milan an tlawm a ngai. Hetiang hi a thlen tum a awm ve thin.” tiin champion inumna chungchang a sawi.
AC Milan in San Siro-ah Atalanta an mikhual a. 2-0 in an hneh.
Milan tan forward Rafael Leao leh Theo Hernandez ten goal an khung a, an inkhelh hnu a inkhel Inter an chak ve avangin season khar ni ah erawh hnehna an chan ngei a ngai.
Milan coach Stefano Pioli chuan, “Kumin hi kan tan kum tha a ni a, mahse a tawp kan la thleng lo. Kan tum a ruh tur a ni a, kan phawklek thiang lo bawk. First half a harsatna kan tawh lai pawhin kan chiai miah lova, chak inring in kan khel tlat a, kan phu zawk a ni.” a ti.