Aizawl : Pathianni zan khan Thenzawl khaw chhungah Saphai lian takin kawng a kan lai man a ni a. Saphai hi Aizawl Zoological Park-ah dah tum ni mah se a remchan loh avangin hmun hima ngaihah chhuah tura ruahmanna siam a ni.
Saphai hi Thenzawl khaw chhung, Rajput field bul, Thenzawl Buarpui kawng sir tui luankawrah helai awnga lirtheia kal te’n a kawng kan lai hmuin an man a. A man tute hian Thenzawl Forest department hotute hrilh nghalin, Saphai hi zan dar 8:30 vel khan bawmah khungin Thenzawl DFO Complex ah dah nghal a ni.
He saphai hi feet 13 vel zeta sei niin Mizorama saphai hmuh tawha lian pawl tak nia sawi a ni. A chaw zawng, ram atanga rawn vak chhuak nia rin a ni a, Saphai hi a nu nge a pa tih erawh he chanchin buatsaih lai hian hriat theih a la ni lo thung.
Thenzawl Forest DFP Lalbiakchama Chawngthu sawi danin, Saphai hi Aizawl-a sahuan lama dah tum a ni a, mahse, Sahuanah Saphai a lo awm sa tawh avangin dah a remchang chiah lo a. Inbiakrawn a nih hnuah hun remchang hmasa berah mihring tana hlauhawm phak loh leh mihring bakah Saphai tan pawna hmun hima ngaihah chhuah mai tura ruahmana siam a ni.
Mizorama Saphai te hi chi hnih – a lian chu (Burmese Python) leh a te deuh chi (Reticulate Python) an ni tlangpui nia sawi a ni.
Saphai (Python) hi Wildlife protection Act 1972-in venhimna a pek sang ber Schedule I animal te zing a mi a ni a. Mi tu pawhin dan kalha Saphai a lo tihlum emaw, a sa a lo ei emaw, sumdawn na’n a lo hmang emaw anih a, Court in thiam loh a chantir chuan kum thum atanga kum sarih lung in tan emaw, Rs 10,000 chawi emaw, a pahnih emaw a hrem theih a ni.