Volkswagen (VW) midsize sedan thar Virtus chuan dealership hrang hrang a thleng tan a. A man zat tur hi thla thar ni 9 ah an puanzar beisei a ni a, trim hnih Dynamic Line leh GT Line a awm dawn a ni.
Platform
Volkswagen Virtus hi Volkswagen lirthei zinga MQB-A0-IN platform hmang pahnihna a ni dawn a, India 2.0 strategy hnuaia duan a ni bawk a ni. Hemi hnuaiah hian India ram tan liau liau a platform hi duan a ni a, himna lamah pawh India sorkarin a phut mil veka duan a ni dawn bawk. He platform hi tangkai taka lirthei chi hrang hrang hatchback, sedan leh SUV te pawh duan theihna tur a ni a, hei hian company pawh rang taka lirthei thar tihchhuah zung zung kawngah nasa takin a pui thei dawn a ni.
GT Line variant
A chunga tarlan tawh ang khân VW Virtus hi chi hnih Dynamic Line leh GT Line ten an tichhuak dawn a. GT ho hi chu tlema sports car design leh zia deuh a nei dawn a ni. Hemi hnuaiah hian blacked-out ORVMs, alloy wheels leh rear spoiler te a awm dawn a. A rawng lamah pawh Wild Cherry Red colour scheme a nei dawn a ni. A chhunglamah pawh sporty red highlight kan hmu ang a, sporty red hian a chei dawn tihna a ni.
A neih tur zingah LED projector headlamp, a hma grille design thar, chrome treatment awm tel nual bakah gloss black airdam, 16-inch wheel and split-LED taillamp, smoked tint finish an tih te pawh a nei tel dawn a ni.
Kentel tur hrang hrang
Volkswagen sedan thar turah hian 10-inch infotainment system, wireless smartphone connectivity awm tel, 8-inch digital instrument cluster, 8-speaker audio system, ambient lighting, ventilated front seats, wireless phone charging, electric sunroof, cruise control, keyless entry, start/stop button leh a dang dang tunlai lirthei changkang ber berin a neih ho chu a nei vek dawn a ni.
Himna lamah chuan airbag paruk, hill hold assist, rear parking camera, Isofix child mounts, tyre pressure monitoring system leh electronic stability control te a nei ang.
A khawl
Skoda Slavia ang chiahin Volkswagen Virtus hian 115PS power pechhuak thei, 1.0 litre TSI petrol and 150PS power
pechhuak thei 1.5 litre TSI petrol khawl te a nei dawn a. Gearbox pathum – 6-speed manual, 6-speed automatic leh 7-speed DSG automatic (1.5L variant ho bikah) te a nei dawn bawk a ni. Virtus lo chhuak tur hi a khan a sang tha khawp mai a, SUV duhtu tam tam a hip viau a rinawm a ni.
Virtus hi sawi tawh angin midsize sedan huanga mi a ni dawn a. Tuna India rama chhuak mek Hyundai Verna, Maruti Suzuki Ciaz, Honda City leh an tlangzarh thar Skoda Slavia te a rawn el dawn a ni. Volkswagen lirthei hi German company lar leh hlun em em a ni a, Mizoramah pawh a mikhual tawh lo a, Polo leh an lirthei dangte pawh nei an tam tawh viau a. Midsize sedan huangah lirthei thar tha tak duhthlan tur a awm leh ang.