Rajasthan-a Congress MLA, Chief Minister Ashok Gehlot-a nena inkawmngeih tak chu state assembly-a member a nihna atangin a bâng.
Ganesh Ghogra-a hi an state-a Youth Congress president ni lai niin Dungarpur bialtu MLA a ni mek a, rorel lai party MLA ni mah se an party-in an ngaihsak lo niin a sawi.
Mipuite harsatna a sawite chu thuneituten an ngaihsak duh lo niin Ghogra hian a sawi a, speaker, chief minister leh Congress president Sonia Gandhi hnenah a bânna lehkha hi a thawn hlawm.
Rajasthan hi nakuma assembly inthlang mai tawh tur an ni a. Congress hian sorkar leh ngei tumin an bei a, an state-ah hian kum 30 liam ta chhungin sorkar lai hi thlan tlin nawn an ni ngai lo.
Rajasthan-ah hian Congress an tling leh dawn em tih NDTV-in a zawhnaah party hruaitu hlun, Sachin Pilot chuan, “Tun tumah hian hna tha takin kan thawk a, miin min sawi dan leh mipui zawng zawng ngaihdan hre lo mah ila hnehna kan chang ngei dawn a ni,” a ti.
Nilaini vek khan inthlan hmabak tho, Gujarat-ah Congress hruaitu, Hardik Patel chu an party atangin a chhuak bawk.