Zothan Autoworks Pro Volleyball League:
Hunthar Veng in semi-final an lut

Hunthar Veng in an chetthat an chhunzawm a. Thawhṭanni zanah set hloh lovin Chhinga Veng Spikers an hneh a, Zothan Autoworks Pro Volleyball League semifinal an lut.
R. Dengthuama Indoor Stadium, Mualpuiah vawi khat tisual a set hnihna hloh thei turin point li in Hunthar an hniam hman a, mahse ropui taka an kir leh hnuah 25-22, 31-29, 25-21-in an chak.
Gagan Kumar chuan point kua paih mahse 27 thawkchhuakin Hunthar tan rin ngamin a khel a, D3 Business Player of the Night lawmman a dawng. Amah thlawp turin Laldensanga’n point 14 hmuin vawi thum a tisual a, team tan awmze neiin a inlan.

Hunthar an che tha fal
League vawi thum an khelh tawhah Hunthar chak vekin team panga inel zingah hmahruaitu an ni zui zel a, Pro Volleyball chanchina a vawi khat nan Durtlang North an hneh hnuah champion lai Spikers tukdawl lehin an khelh hnuhnun vawi hnihah 3-0 ve ve in an chak zawn.
Champion lai ni chunga knockout round lut pha lova tlak pumpelh turin Chhinga Veng in chak an mamawhna a sang. El tham pangngai takin khel mahse an nghet tawk lo va, hun pawimawhah hriam zo lovin vawi thum an tlawm zawnna a ni a, an hmabak a khirh tawh hle.
Sujith Acharya chuan point 22 hlawhin vawi kua a tisual a, a vawi khat nan Spikers chakpui a tumna a puitlin thei lo va. Ramengmawia’n point 13 hmuin point li a hloh a, mi malin khel chhe lo mahse team leh player mal inelnaah Chhinga Veng in an elpui an pha lo hret zel.
Set hmasa berah point an inhmuhchhawk a, 20-19 a Hunthar in hma an hruai hnuah Densanga’n a zawnin vawi li vaw tla in harsatna lian nei lovin set an la.
Set hnihnaah Sujith leh Ramenga’n Chhinga Veng nawr kalin 11-6-in an sang. Set la thei ngei turin an sang fal zui zel a, Ramenga’n tha taka a vuak tlak hnuah point hmuh belha tlang thei turin 24-20-in hma an hruai.
Mahse an huntha neih an bawhpelh a, Gagan-an tum thum a vuak tlak zawn hnuah Huntharin 25-24-in an lehthal.
Chhinga Vengin dang ve lehin vawi ruk an deuce zawn a, a tawpah erawh Hunthar an dingchang.
Set thumnaah Chhinga Veng an thochhuak thei tawh lova, Hunthar lamin inrintawkna an nei sang telh telh a. Harsatna an tawk tawh lo.
Hunthar tan Durtlang North an hneh tuma khel tha ber lawmman dawngtu Lalramnunfela’n point nga hmuin vawi hnih a hloh a, mi dang langsar zawkin Zomuansanga’n point riat thawk chhhakin vawi hnih tho a tisual.
An inlan hnuhnung vawi hnihah an khelh hmasak bera che tha tak Chhinga Veng captain Lallianmawia Pachuau chuan team a fuih phur zo lo a, Hunthar hmaah point nga a hmuh zat chiah a hloh. Lalnunpuia’n vawi khat tisualin point kua a hlawh na a, a chim chin a sang pha lo.
Vawi thum an khelh tawhah Spikers an tlawm vek a, la tla lo mahse kawng a zim sawt hle. Zirtawpni zanah league khel zovin Tuichangral nen an insu dawn a, chak ngei ngei an mamawh rualin min dang dinhmunah an innghat tel.
Vawi hnih champion tawh Hunthar in rin an hlawh telh telh a, semi final lut fel tawh chungin Ningani zanah league hmawr an bawk dawn a, an elpui kumhlun TNT nen an intawng ang.

Leave a Reply

Your email address will not be published. Required fields are marked *

error: Content is protected !!