Tun hnaiah Mizoramah tuialhthei chawkluh a awm mumal lo a, hemi avanga harsatna a thlen tan mek laiin Supply Minister K Lalrinliana chuan tuialhtheiah tam a thlen lo nan sorkarin theihtawp a chhuah a, mipuite chiai lo turin a ngen.
Assam leh Meghalaya chhung hmun thenkhata ruahsur nasain tui lian leh lei min nasa tak a thlen mek a, hei hian rel kawng leh kawngpui a tichhe nasa a. Assam chhunga Lumding leh Badarpur inkara lei minin rel kawng a tichhia a, tuialhthei phurtu rel a tlan thei lo a, Mizoramin a tuar tan mek a ni.
Hemi chungchanga The Zozam Times zawhna chhangin supply minister chuan state thenawmin harsatna an tawh avanga tuialhthei chawkluh a mumal theih tak loh avangin sorkarin tuialhthei hralh kawngah khuahkhirhna an siam nghal thu a sawi.
Mizoramin tuialhthei a lakna, Ramnagar oil depot, Silchar-ah petrol khawl sa a tam tawh loh thu sawiin, hemi avang hian Guwahati atangin by-road-a lak luh tuma ruahmanna an siam mek thu a sawi a, “Oil tanker 24 tirh thlak tum mek a ni a, ruahmanna dang pawh kan siam zel ang,” a ti.
Nilaini tlai thlenga Aizawl leh a chhehvela filling station hrang hranga tuialhthei awm zat a sawi danin petrol normal litre 1,30,000; petrol XP litre 31,000 bawr vel leh diesel litre 2,30,000 bawr vel a awm mek anga chhut a ni.
Mizoramin tuialhthei a kawl mekte daihzai taka mipuiin an insem theih nan khuahkhirhna chu siam an nih thu a sawi a, lirthei azira tuialhthei lak zat an bituk anga an kal zel chuan tamna nasa a thlen a rin loh thu a sawi.
Supply minister chuan mipuite chu chiai lo turin a sawm a, “Sorkarin kawng hrang hrangin hma a la a, hasatna lian tham pawh a thleng lo turah ngai ila, tuialhthei leh thil dang pawh huamhauh taka lo inchhek khawl hi ti lo hram ang u,” a ti.
Rel kawng chhia hian tuialhthei chawk luh bakah buhfai lak luhah pawh nghawng a nei thei tih a sawi tel bawk a, chutihrual chuan furpui atan buhfai khawl khawm sa thahnem tak a awm a, June thla vel thlenga rel kawng a that loh erawh chuan harsatna chu a thleng thei tih a sawi.
Mizorama tuialhthei chawk luh a mumal loh chungchanga The Zozam Times zawhna chhangin All Mizoram Petroleum Dealers Association (AMPEDA) President K Lalnghakliana chuan filling station tinin tuialthei an kawl mek hian ni tam a daih tawh dawn lo tih sawiin, tuialhtheiah harsatna nasa zawk a thleng thei reng tih a sawi.
AMPEDA president chuan filling station thenkhatah chuan coupon tel loa tuialhthei a lak theih tawh loh thu sawiin, “Filling station thenkhatin mipui nawlpui tan la hralh chhuak thei nei rih mah se ni reilo te-ah chuan an hralh tur an neih loh thuai a hlauhawm tan,” a ti.
Kawng chhiat emaw, thil dang avanga ni hnih khat tuialhthei phurh theih a nih loha Mizoramin tam a tawk nghal zel thin chu tha lo a tih thu sawiin Mizoram sorkarin oil depo buatsaih vat thei se, thla khat tal daih tuialhthei khawlkhawmna neih vat a tul tawh hle nia a hriat thu a sawi bawk.
The Zozam Times-in nimina Aizawl khawpui chhung hmun hrang hranga petrol pump a tlawh kualnaah tuialhthei lak tum lirthei intlar a thahnem hle a, hmun thenkhatah chuan lirthei kal vel tibuai khawpa petrol la tur lirthei intlarna pawh a awm.
Mizofed Petrol Pump-a thawktute chuan Thawhlehni zan khan petrol la tur chu zing dar 2 thleng an intlar thu an sawi bawk a ni.