Taliban chuan Afghan hmeichhe TV presenter-te chu TV-a an lan laiin an hmai tuam turin an ti.
Chanchinbu (media outlet) hrang hrangte hnenah Nilaini khan he thupek hi pek an ni tih religious police thupuangtu chuan BBC Pashto a hrilh.
Chawlhkar hnih liam ta lekah khan hmeichhiate chu khawlaiah an hmai khuh vek tura tih an lo ni tawh a, an zawm lo a nih chuan hremna an hmachhawn a ngai.
Afghanistan-ah hian Taliban-in ro an rel leh hnuah hmeichhiate khuahkhirhna a na leh sawt tawh hle a. An chhungte zinga mi mipa tel lo chuan an zin chhuah pawh phal a ni lo va, hmeichhiate tan secondary school pawh khar a ni.
TV presenter-te laka khuahkhirhna siam thar hi mi tam takin Twitter-ah an sawisel zui nghal a, mi tam tak chuan Taliban-in hleihluak taka thil an kalpuina thin rahbi zawh zelna niin an sawi.
Hmeichhiate dikna chanvo humhalhtu pakhat chuan, “Covid laka him nan khawvelin mipuite hmai tuam turin a ti a. Taliban erawh chuan miin hmeichhe chanchinbumite an hmuh lohna turin a ti ve thung. Taliban tan chuan hmeichhiate hi natna hrik an ni,” tiin a tar lang.
Mi mal enkawl, Shamshad news channel chuan an an news presenter pakhatin a hmai a tuam lai thlalak an dah chhuak a, hetiang bawk hi social media-ah pawh thehdarh a ni.
Nikum August thlaa thuneihna an chan leh hnuah Taliban hian hmeichhiate inthuamna tur dan thar eng emaw zat a tichhuak tawh a, hmeichhiate a khuahkhirh lutuk lo.
Mahse, May thla tirah khan Ministry for the Prevention of Vice & Promotion of Virtue chuan hmeichhia zawng zawngten khawlaiah an hmai an tuam tur a ni tih thupek a tichhuak ta a. A zawm lote chuan hremna chi hrang hrang an tawrh theih thu chhuah a ni bawk.
Khawlaiah hmai tuam tura hmeichhiate an tih hnuah tunah hian khauh lehzualin TV-a an inlan dawn pawhin an tuam zui a ngai dawn ta a ni.
“Tolo news-in thu a dawn dan chuan thupek thar hi Afghanistan-a media outlet zawng zawngte zawm tur a ni,” tiin news channel hian a puang a ni.
Khawlaia hmai tuam tura thupek
Afghanistan-a roreltute hian May 7 khan hmeichhiate chu Islam sakhaw dan anga hmai tuamna hmangin khawlai an chhuah reng rengin hmai an tuam tur a ni tih a thupek a chhuah.
Hmeichhia tupawh, he thupek zawm lote chu anmahni enkawltu, an chhungkuaa mipa chuan ni thum chhung lung in a tan phah thei.
Taliban hian kum 1990 chhova ro an rel hmasak hun lai khan burka an tih hmai tuamna chu hmeichhia zawng zawng hman turin an lo kalpui tawh thin a. Nikuma thuneihna an chan leh hnuah erawh he thupek hi an kalpui mai lo thung.
May 7-a thupek siam a nih hma pawh khan hmun tlema zawngah chuan Afghan hmeichhiate hian burka an hmang sa a; mahse, khawpui deuhvah chuan hmang an awm mang lo thung.
Thupek hi Taliban sorkara Ministry for the Prevention of Vice & Promotion of Virtue-in a siam a ni.
Taliban thuneitute chuan hmeichhiate inkhuh tura an tihna hi ‘ngenna’ angin sawi mah se a zawm lote hremna dan an zawm tel thung a, khauh taka thupek a ni mah zawk.
A zawm lote chu a vawi khatnaah an ina kalchilhin an pasal, an nuta, leh a pa emaw hnenah zawm tura hrilh tur a ni.
A la zawm loh cheu chuan amah enkawltu an chhunga mipa chu ministry-in kovin thu a zawt ang.
A vawi thumnaah chuan a enkawltu hi court-ah hruai a ni ang a, ni thum chhung lung in tang tura hrem theih a ni ang.