Chelsea manager Thomas Tuchel chuan an defender Andreas Christensen chungchang sawifiahin FA Cup final an khelh hma lawka squad atanga a inhnukdawk chu tun season a vawikhatna a ni lo tih a sawi.
Christensen hi inhliamna nei lo niin Wembley Stadium a Liverpool hmachhawn tur zingah telh a ni a, mahse inkhelh dawn ni ah coach hnenah a inkhelh theih loh tur thu a hrilh.
Tuchel chuan Nilaini a chanchinbu mite a hmachhawn tumin hemi chungchang hi sawiin, “Ama lam atangin chhan a awm a, hei hi kan sawichhuak dawn lo.”
“Tun season-ah vawikhatna a ni lova, tunhnaiah pawh inkhelh loh a nei leh thin atangin he thil hi a chiang.” a ti a.
“Final kan khelh hma a Leeds United nen kan inkhelh tum khan a khelhthat avangin a final khel turin a inpeih a, dinhmun tha taka awmah kan inngai. Mahse inbiakna kan nei a, a thutlukna kan zahsak a tul. Keini chuan a thusawi kan ngai pawimawh a, kan thlawp tlat a ni.” tiin Christensen chungchanga zawhna a chhang.
Chelsea hi season thar a UEFA Champions League group stage khel tura tling chiang tawh an ni a, nizana an inkhelah Leicester City an hneh a nih chuan pathumna an ni chiang lo.
Tuchel-a’n Christensen hi season zawh hma a inkhel an la hmabakah a inkhel thei ang em tih a hriat loh thu a sawi tel bawk.
Kum 26 mi Danish defender hi nipuiah chhuak tura ngaih a ni tawh a, Barcelona nen inremna an nei tawh nin an sawi.
Hei vang hian Blues lamin club neitu thar tihfel a nih hnua player lalut thei a an awm veleh an tlarhnung a khel tur lakluh an ngai pawimawh hle.
Christensen bakah Antonio Rudiger chu a chhuah dawn bawk avangin Blues in tun nipuiah central defender pakhat tal lak an duh a. Sevilla atangin French defender Jules Kounde chu sawi rik a ni mek.
Kum 23 mi Kounde hi nikuma lakluh an tum tawh niin player aiawhte nen nikum atang daih tawhin contract chungchang an lo sawi tawh a. Club lamah an inrem thei lo thung.
La Liga club hian a thlaktu tur an lakluh thuai theihna turin a chhuah dawn chuan inremna neih hma an duh a. An club sum dinhmun siamtha tura June 30 hma a Pound maktaduai 38 vel hmuh mamawh Sevilla hian a manah Pound maktaduai 59 vel an chhiar mek. Ani bakah Presnel Kimpembe, Josko Gvardiol leh Jose Gimenez te nen sawizawm an ni bawk.