Kan hnam nun a dahlau mah mah tawh em?
Assam leh Meghalaya hmun thenkhatah khuarel chhiatna a thlen avangin lirthei chetvelna tam tak a tibuai a, lirthei neituten oil-ah harsatna an tawk mek bawk. Hetiang huna awm dan kan thiam erawh hi chu a ngai tawh hle.
Kan hriat angin Assam leh Meghalaya chhung hmun thenkhata ruahsur nasain tui lian leh lei min nasa tak a thlen mek a, hei hian rel kawng leh kawngpui a tichhe nasa a. Assam chhunga Lumding leh Badarpur inkara lei minin rel kawng a tichhia a, tuialhthei phurtu rel a tlan thei lo a, Mizoramin a tuar tan mek a ni.
Hetiang hi kan dinhmun a ni a, sorkar lamin theihtawp chhuahin, harsatna kan tawh loh nan hma an la a, mahse hetiang hun remchanga lo la, inchheprelh nghek duh mihring kan la awm thin hi a pawi hle. kan pipute thurochhiah kan bosal ta lutuk thin hi engvang nge ni ang? Heti tak maia midangte ngaichang lek lova nung duh mihring kan awm ta mai hi ngaihtuah chian a va ngai ta em.
Hetiang kan nih karah hian supply minister chuan Mizoramin tuialhthei a lakna, Ramnagar oil depot, Silchar-ah petrol khawl sa a tam tawh loh thu sawiin, hemi avang hian Guwahati atangin by-road-a lak luh tuma ruahmanna an siam mek thu nilaini khan a sawi a, “Oil tanker 24 tirh thlak tum mek a ni a, ruahmanna dang pawh kan siam zel ang,” a ti a. Mipuite tan lo chiaina viau tur awmin a lang lo bawk. Tunah chuan kan tan sorkar pawh a che chhuak ve ta bawk niin a lang a, engah kan mangan ang?
Mahse, midangte ngaichang lo leka nung duh leh hun hmang mihring kan awm a, lirthei nei kan pung ve zel bawk nen, mizia inang hlawm lo mah se kan hnam tihdan mawi leh hman thinte bosan zawng lova khawsak dan i thiam teh ang u. ‘Sem sem dam dam, eibil thi thi’ tih nunpuitu hnam kan nih kha.