Gabon captain Pierre-Emerick Aubameyang chuan international football a chawlhsan thu a puang.
2023 Africa Cup of Nations qualifying tan nan kar hnih a la awm a, qualifying an khelh hma in kum 32 mi Gabon captain hian a thutlukna a siam.
Gabon Football Federation chuan Aubameyang-a thutlukna hi ziak a an dawn thu an sawi a. “Kum 13 chhung kan ram aiawhin theihtawp ka chhuah thin a, he ram kawr hi chhuang takin ka ha thin. Tunah ram inelna a ka hun ka khar dawn tawh tih hi ka hriattir duh che u.”
“Gabon mipuite chungah lawmthu ka sawi duh a, huntha ka tawnlai leh hun harsa ka paltlang laiin min thlawp tlat reng thin.” tiin ram tana vawi 68 inkhel a goal 29 khungtu Aubameyang chuan a sawi.
“Gabon tana ka inkhelh hmasak ber te, African Player of the Year chawimawina ka lo hawn tum te ka hre reng tawh ang. Ka pa hnenah lawmthu ka sawi a, a hnungzui a Gabon kawr ha turin min duh a, a tana chhuanawm tak ni tura hnuhma kalsan ka neih ka inbeisei.” tiin a sawi.
France apiang Aubameyang hi France Under-21 team tana khel tawh a ni a, mahse a pa hnungzuiin Gabon tana khelh a thlang a. A pa Pierre Aubameyang hi Gabon in Africa Cup of Nations an khelh hmasak ber tum, kum 1994 a an captain a ni.
Gabon Football Federation nen an inkar a tha reng ngai lova, kum 2018 khan a pa chu an ram coach thar ni tura inremna an tihfel hma a an lo puan hnan avangin a sawisel tawh.