- Mahmuaka Chhakchhuak
Ka Pathian chu mi thenkhatte chuan vanah a awm an ti thin a, kei chuan hmun tinah a awm ka ti. Amah chu eng ang hmelpu nge erawh ka hre lo nain a hmel chhe lo a nih ka ring a, kan Pathianthuah ngei pawh a hmel chu ni anga eng a ti a nih kha, chu mai la ni loin a mitmeng pawh engkim hmu tlang thei vek tur ang hialin a fim kak ka ring bawk a ni. A kiangah chuan mitin, mi chhumchhia leh ramtuileilo mai bakah keini ngaiha mi ropui ni kher lote pawh hi an tlangnel ka ring a, tlangnel bawrh bawrha ngampa tur erawh chuan a tawng tui tam a, fiamthu phei chu a uar vak erawh ka ring lem chuang lo. Engkim a tihtheih ka ring nain kan dil leh beisei ang vek erawh chuan a hlawhtlin tir vek ka ring bawk lo a. A chhan chu a rorelnaah min telh ve ngai tlat loh vangin.
Ka Pathian chuan kan nimin hun a hria a, kan vawiin hun a hre bawk a, kan naktuk hun hman tur thlengin a hre lawk vek a, kan thiltih tha leh tha lo pawh a hmuh hmaih chuang ngai lo. Nimahsela chuti chung chuan kan duhthlanna a nghah zawk fo avangin mi a thunun nghal lem lo fo thin. A nelawm em em rualin a zahawm a, a thusawia a rinawm avangin belhtlak a ni a, belh ngam loh tur khawp erawh chuan a hlauhawm si loh. Rilru thianghlim leh mi dikte tan chuan a nelawm em em a, thinlung sual leh kawhmawh bawlte tan pawh sima a lam pan theih turin engtiklai pawhin a inhawng reng bawk a ni. Chuti chung erawh chuan midangte angin a bum ve theih tlat thung si loh.
Ka Pathian chuan amah hnaih turin mitin min sawm a, a lam pan turin min duh reng nain kan duhthlanna erawh a nghak ve fo thin bawkin a hriat a, chutichung chuan keini erawh chuan hlat tak tak ngam si loin kan hnaih ngam bawk chuang thin si lo a, tuilairapin hun kan hmang reng zawk a nih hi. Manganna kan tawhin Amah chu kan au a, diklo taka sum lakluhna hun a awmin Amah chu kan theihnghilh leh a, kan damlohin A hnenah damna kan dil a, kan dam a, Amah aia kohhran mitmei veng zawkin rawngbawlna kan nei leh a, Eirukna leh kut tling loa lakluh avangin In ropui leh nuam tak kan nei a, a chhungah ‘Kei leh ka chhungte chuan Lalpa rawng chauh a ni kan bawl dawn‘ tih thu tar kan hreh leh chuang hauh lo a, Bible lah chu kan dah langsar em em a, kan chhiar peih leh chuang lem chuang si lo!
Ka Pathian chuan kan thiltih ang zelin lawmman min pe thin a, nimahsela kan phu tawk lawmman kan hmuhin kan lawm chuang hauh lo a, langsar taka rawngbawlna kan neih laiin Ani chuan pindan chhunga Amah betu chu a ngaithla zawk si. Rawngbawlna hi incheina atan kan hmang a, kohhrana nihna leh chanvo hi inchawimawina atan kan hmang ta zawk si a, chumi rah chu kan senga hei kan kristian percentage pawh a sang zawng niloa a hniam zawnga a than tak daih zel hi! Kohhran tin hian hmuh theih loh, vana kan Pathian mittlung tak hian rawngbawlna nei theuh ila chuan India rama HIV hrik pai tam berte zinga awm kan ni hauh lo ang a, Missionary Nuaih khat tirh hi Politician pakhat tawngkam mai niloin a takin kan tir thei ngei bawk ang.
Ka Pathian chuan he kan ram hi a hmangaih a, a mi chengte mil ang zela ram hi awm tur nisela chuan thlaler ram ang mai neih pawh kan phu hial awm e tih tur a nih laiin khawi lai hmun maiah pawh hian thlai a tha duh em em vek mai a, kawmthlang huanah zawng luruhro pawh paih ila a rawn vak chho leh theih hial ang tih tur khawpin kan ram leilung hi a tha a, khaw kar kawngah te lah hian kawi tinah tui in tur awm vek ang hial khawpin tui intlak lah kan hniar hnar bawk a, ruahtui lah chu hnianghnar takin kan dawng reng bawk nen. A chhunga chengte hian kan zir ngang siloa hmun danga thawn chhuah tur thlai tharchhuah engmah pawh tun hun thlengin engmah kan la nei lo tluang zel chu a ni a, kut hnathawktute nge ram hruaitute zawk demawm ta ang?
Ka Pathian hian he kan Ram hi hei aia hmasawn tur hian rahbi min la rah tir hi ka ring tlat a, chumi hun nghak chuan nitin ring ka fan a, a hmanrua atan tute nge a hman ang? Engtik hunah nge chu hun chu a thlen ang? tiin chhanna hriat mai theihloh zawhna ka inzawt reng a, beisei nei takin ka thlir reng a, A mi thianghlim mi tlemte te tawngtaina hi a thlawnin a awmtir ka ring si lo. Kohhran khawmpuina hmunah ngei pawh kan sakhaw rawngbawltute pawhin ram vei thu lam hawi sawiin ring tak taka an lo au ta hial mai te hi ram rawngbawltute zir loh vang ngawt chu a ni bik hauh lo ang. Ram an hmangaih vang leh ram tana thiltha zawk beisei an neih vang a nih hi kei ka ring tlat a ni. Hei vang hian ‘keichuan Pathian tihna avangin ka ti ve thei lo ang’ ti theitu ram hruaitu hi eng nge maw zat kan neih a hun tawh a, anni hruaina hnuaiah kan ram hian kawl eng kan la hmuh vat hi ka ring nghet tlat bawk a ni. Chumi hun lo thleng tur nghak chuan tuktin ka thlir a, ka mit ka len ruai bawk thin. Vana ka Pathian hian a hun takah kan ram hi hnute tui leh khawizu luanna ram angah ala buatsaih ngei ka ring tlat a, chuvang chuan kan zain i nghak hram hram ila, ‘Ka Pathian, ka Pathian engah nge min kalsan’ tia beidawng taka kan auh hun hi thleng mawlh suh se.