Australian pa pakhat, tuipuia sangha lian zualte khawmual hnaih lutuka an kal loh nana len hmanga dannaa whale (sangha lian) tang chhanchhuaktu chu a thiltih avangin pawisa chawitir a ni hlauh!
Gold Coast vaukam hnaiha len an zarah hian Thawhlehni khan whale hi a tang tih a hmu a, puih a ngai tiin thuneitute pawh a hrilh hmasa a; mahse, darkar eng emaw zat a liam hnuah pawh thuneitu lam an lo lan mai loh avangin chhanchhuak turin a thawk chhuak ta a ni.
A lawngleng hmanga inkhalh chhuakin sangha lian tang hi a va chhanchhuak ta a. Khawmuala a kal leh chuan thuneituten a thiltih avangin pawisa an lo chawitir ta hlauh thung si.
Engvangin nge pawisa hi chawitir a nih a inhre mai bik lo va; mahse, Queensland state thuneitute chuan sorkar thil a khawih avang leh whale hnaih lutuka a kal avangin dan a bawhchhia niin an sawi ve thung.
He pa hi ‘Django’ tiin a insawi mai a, a thil tawn chu mak a tih thu a sawi a. “A tanna atanga chhanchhuah tum mai kha ka ni sia,” tiin ABC hnenah a sawi a. Chhanchhuah nan pawh chemte bak a hmang lo niin a insawi bawk.
Australian chanchinbu pakhat chuan tuipuia a chetla lai hi khawmual atangin mi tam takin an lo thlir bawk niin an tar lang a. A thlirtu zinga pakhat chuan Gold Coast Bulletin chanchinbu hnenah pawh thuneituten an puih hun nghalin rei tak an awm niin a sawi a. “Vanneihthlak takin Samari mi tha a lo lang a, fisheries-te hna chu amahin a rawn thawk ta a ni,” tiin a fak.
Australia-ah hian vaukam hnaiha len zar hi inhnialna siamtu a ni ve hrim hrim a. Vantlang himna atana tih a nih rualin mi tam tak chuan nungchate zalenna rahbehnaah an ngai ve thung.