Nau vei leh a hrin! He thil pahnih hmachhawn tur hian hmeichhia te hi hlauthawng leh huphurh tak chungin an inbuatsaih lawk thin.
Taksa leh rilru mai bakah ei leh in tha te nena tan a ngai a. Nau neih lam hawi ziahna lehkhabu chhiar tam te, chhungte leh thenrual thate tanpuina dawnte hi a pawimawh hle.
He nau neihna lam-tluangah hian chhung lam mi pawh a inrawlh nasa hle a. Chu chu ‘naute’ hi a ni. Nu-in nau a vei chiah hian, naute pawh hi a awm mai mai bik lova, ama tawkin a lo tang ve nasa hle thin.
Thla kaw chhung zet chu chhul-ah hian naute hi a khawsa a, a chhunga awm tui hnang, ‘Amniotic fluid’ chuan a himnan leh damnan tha takin a lo vawng thin.
Tichuan, a hun a lo thleng ta a, chhul luhka in hawngin, chhung lam atanga nawrna danglam tak hmangin ‘hringnun’ zawh turin khawvel a rawn dai tan dawn ta.
Naute leh Nau vei vawikhatna
A hun a lo thleng chiah tihah mak danglam takin chhul hi cm 10 laiin a inkau ta a. Chutah chuan naute mawngbawr velah nawr-na nasa tak mai lo awmin, a hmalamah a nawr kal tan ta a.
Naute hian Lû lamah pawh he nawrna hi a hmachhawn bawk a. Tichuan chhul kawngkaah a rawn lawr ta a ni. Chhul insang mar mai bakah naute pawh hian a taksa bung hrang hrangte chu ti che ve-in, a innawr ve thin.
Naute leh Nau vei vawi hnihna
Chhul kawngka a lo inhawn hian serh kawng lamah tawlh thla-in, naute hian 90 Degree anga a inherrem dawn avangin helai taka hi a harsa lai ber a tih theih awm e. Nu ber pawhin a taksa chu ngil taka a lo siam ve a ngai thin.
Tichuan, naute chuan khawvel eng chu a rawn hmu ta a. Boruak te, kut vawt tak te, hmelhriat ngai lohte hmel chu a rawn hnimhnai tan ta.
A vawikhat nan a Chuapah boruak a lut khat nghal a, a thawk vawikhatna a la nghal.
Naute leh Nau vei vawi thumna
A pian hlim hian naute hi a tap nghal thin a. A tah vakna chhan hi hriat a châkawm mai thei. A vawi khat tahna hian a Chuapah boruak a awm tawh a, thâwk hmasa ber a la tih hriattirna a ni a. I kutah naute hlan a ni veleh a bâng ve leh nghal thin.
Mi dang kuta a awm lai chuan naute hi a tap lehnghal mai thin a. Mahse, a nu kuta a awm chuan tunhma atanga a lo tem lawk tawh lungphu ri te, a nu aw te leh a duhsakna leh duatna te’n a uaplum nghal thin a, thlamuang takin a mu ta siai siai thin.
A vawikhatnan a nu hmel a han hmu a, nu leh fa inkara a tak rama inzawmna hmasa ber chu a lo thleng ta.