Rangers rilru a na a, lawm avangin German mipui an lam thung. Eintracht Frankfurt chuan Europa League final-ah penalty shootout hmangin Scottish club an hneh a, kum 25 hnua a vawikhatna atan German club in Europa League trophy an chawi.
Ramon Sanchez Pizjuan Stadium a inkhelah Rafael Borre chuan chakna penalty a khung a, a penalty pet hma hian Rangers tana Aaron Ramsey pet chu save a ni a. An club tantu tam takin Seville khawpuiah tawiawm mahse Rangers in a vawi nga nan Europe huap inelna final-ah a tlawm zawk chan an chang.
Bundesliga a 11-na Frankfurt tan hlawhtlinna ropui a ni a, champion trophy an chawi bakah season tharah UEFA Champions League group stage-ah hmun an chan phah dawn.Final boruak a pui
Spain rama Andalucia khaw zinga khaw lian Seville-ah Scottish mi leh German an kalkhawm hnem a. Stadium khatin an club tante an tawiawm. Inkhelh laiin an thawm a ring a, inkhel boruak pawh a sang.
Final boruakah erawh Rangers in Borussia Dortmund, Braga leh RB Leipzig te an paihthlak tuma an inrintawkna ang kha an nei thei lova, Frankfurt chu inkhel a che tha zawkah an tang hmasa.
Ansgar Knauff leh Djibril Sow hmanga chance an neih erawh an chhawr thei lo.
Second half-ah Rangers chu goal khung hmasa zawk an ni thung a, Joe Aribo chuan ball siamsak a nih hnuah zam miah lovin goal a khung. Hma erawh an hruai rei lo. Frankfurt tan forward rinrawl Rafael Borre chuan minute 12 hnu lekah an si phurh a sut a. Huntawp thleng goal lut lovin extra-time a chak an awm loh hnuah penalty shootout a chak zawk an zawn a ngai.Penalty an pet
Rangers tan captain James Tavernier a dingchhuak a, penalty thelh ngai lo in a khung. Steven Davis leh Scott Arfield ten an pet goal chhunzawm a. A palina a pen chhuak Aaron Ramsey pet chu Kevin Trapp-a’n a save sak.
Kemar Roofe chuan Rangers penalty hnuhnung pet goal mahse Christopher Lenz, Ajdin Hrustic, Daichi Kamada leh Filip Kostic ten an khung vek a. Chakna penalty Rafael Borre chuan a khung zui.Coach a lawm
Eintracht Frankfurt coach Oliver Glasner chuan, “Zaninah kan tho leh a, tun season a ka player-te hlawhtlinna hi thu a sawifiah theih pawh a ni lova, tawngkam hi ka haihchham khat hle chungin tunah chuan sawi tur ka hre lo.”
“An zavaiin theihtawp an chhuah vek a, boruak sang berah pawh an buai lo. Fak an phu a, khel tam lo zawkte pawhin fak an phu a, final a squad a lang ta lote pawhin tha an thawh vek. Team anga kan beihna leh kan tanrualna hi kan chakna a ni.” tiin a sawi.