Sikkim sorkar chuan Neolissochilus Hexagonolepis an tih, vantlangin Chocolate emaw, Copper Mahseer an tih thin, an state chhunga miten Katley tia an koh awlsam mai chu an state fish atan an pawm tih an puang.
Sorkarin Gazette notification a tihchhuahah, “Sikkim sorkar chuan Neolissochilus hexagonolepis, Chocolate emaw, Copper Mahseer emaw tia sawi thin, tual chhunga Katley tia sawi bawk chu State Fish of Sikkim-ah a pawm tih a puang,” an ti.
India ramah hian Neolissochilus hexagonolepis (Katley) hi Himalaya tlangdung state, a bikin hmarchhaka Arunachal Pradesh, Sikkim leh Nagaland velah an awm ber thin.
Sikkim-ah hian hmun sang tak takah an awm thin a, Teesta leh Rangit lui leh a pengah hmuh tur an awm tam ber.
Sorkarin thuchhuah a siamah chuan, “A taksa rawng danglam tak avang hian a hming pawh hi ‘Chocolate Mahseer’ tia sawi mai thin a ni,” an ti.
Katley hi tui thianghlima khasa chi niin hnim hring leh sa pawh ei thei ve ve an ni a. Sangha pem chi an ni baw a, inthlahpung tur leh chaw zawngin tui thianghlim tha awmnaah an pem nasa thin hle.
An inthlahpun dawn hian lui mawng lam atangin a hnar lamah an insawn tlangpui thin a, lung karah leh dumin a bawh hmunah an inthlahpung thin.
“An inthlanpun hun hi April leh October a ni deuh ber, August leh September-ah pawh an an inthlahpung ve thin bawk,” tiin sorkar thuchhuahah hian tar lan a ni.
An no inhlawm khawm kg 1-ah hian no 3500 vel a awm tlangpui thin a, a puitlin hnuah hian kg 11 thlenga rit an ni thei a, feet hnih vela sei an ni thei bawk.
Katley sangha hi Sikkim-a sangha mantuten an man duh ber pakhat niin a sa ei duh an tam a, a man pawh a to hle bawk.