Aizawl atanga motor-a darkar khat vel tlan ngai, Rawpuichhip, Mamit district-a Govt. Rawpuichhip High School chuan a zawnin kum thum chhung an zirlaite HSLC exam-ah 100% pass an neihpui thei a, Covid-19 hri leng vangin tun tum exam-ah inbuatsaihna nei tha tawk lo mah se, an zirlai 28-te chu 100% pass result an neihtir leh thei ta tho.
Rawpuichhip HS Headmaster P. Rohmingthanga chuan Mizoram puma lockdown kalpui vanglai kha chuan class an kal theih bik loh thu a sawi a, chutah khawtlangah hri leng a lo awm leh bawk nen, an buai hle tih a sawi.
“Kumin January leh February thla pum kha chu study camp neihpui tawpin, he thla hnih chhung hian kan zirlaite chu text book pum pui, sorkarin omit portion a siam loh zawng risk-in kan zirpui vek tawp,” tiin The Zozam Times zawhna a chhang.
P. Rohmingthanga chuan, “Kum 38 ka service tawh a, ka zirlaite leh staff-te hi tlai lo turin ka hrilh ngai lo, keimah hi ka kal hma mai a, gate-ah duty-in naupangte ka chhiar a, tlai an awm leh awm loh ka hre thei vek; chutichuan, ni tin ka ti thin. Min bum thei lo. Staff-te pawh missionary rilru pua kan hnathawhna hmuna hun eiru lo tura ka hrilhna tha ber chu an thutna bul dawhkan theuhah thingpui ka dahsak hman vek. Ka tlai ngai lo tihna a nih chu. Chanmari West atang pawhin ka staff-te an rawn tlai ngai lo,” tiin a sawi.
HSLC exam an hmachhawn danah nu leh pate nen an thawhhona a that thu a sawi a, zirlaite tiphur turin assembly neihpuiin, a tithate chu dawhsanah an thuttir thin thu a sawi a, matric-a letter hmu leh tithate ngat phei chu ama sum senga pawisa fai a pek ziah thu sawiin, insengah a inngaih ngai loh thu a sawi bawk.
“Zirtirtute chuan kan missionary hmun chu kan zirlaiteah a ni tur a ni, tih hi ka sawi tam ber a ni bawk,” tiin P. Rohmingthanga hian a sawi a ni.
HSLC result tihchhuah takah khan Rawpuichhip HS atang hian zirlai 28 exam-in an pass vek a, a kum zawnin kum thum chhung 100% record an nei ta bawk.
January leh Feruary thla pum study camp an neih lai hian an inkhung ngawrh thu leh zirlaite phei chu an chhuah loh thu a sawi a, an chhungten ei tur dahin zirtirtu pathumin an awmchilh chawt thu leh an chhuah bik loh thu a sawi.