Aizawl: Mara Autonomous District Council (MADC)-a sorkar siampui tura Congress MDC-ten MNF an thawhpui chu Congress party thuneitu sang, Political Affairs Committee (PAC) thutlukna kalh a nih avangin insawifiah tura Show Cause Notice pe nghal turin MPCC Disciplinary Action Comittee hriattir an ni.
Nimina Congress President Lalsawta hoa PAC thutkhawm hmanhmawh neihah hemi chungchang hi rel niin, MADC huam chhunga district congress hotute leh Congress MDC pali-te chu eng vanga PAC duh dan kalha MNF nena sorkar siam ta mai nge an nih tih insawifiah tura Show Cause Notice pe nghal turin MPCC Disciplinary Action Committee a hriattir ta a ni.
Tar lan tawh angin MADC inthlan neih zawh takah party mal sorkar siam thei an awm loh avangin party-te an indawr kual nasat karah Congress leh MNF ten thawhho remti sorkar an siam a ni.
May 15, 2022-a Congress party thupuangtu, Dr Lallianchhunga’n thu thar thehdarh tute a kawmnaah, MADC-ah BJP leh MNF ten sorkar siampuiah sawm ve ve mah se party thuneitu sang, PAC-in ngun taka a ngaihtuah hnuah eng party mah thawhpui loh an rel tih a lo sawi tawh a. Hemi tuk lawkah Congress MDC-ten sorkar siampuia MNF thawhpui turin thutlukna an siam a ni.
May 17, 2022 khan Congress President Lalsawta chuan PAC-in MADC-a sorkar siampui tura party dang thawhpui loh a rel tawh hnua Congress MDC-ten MNF thawhpuia sorkar siam an tum chu an ngaih thu tak thu a sawi a. Show Cause Notice pek a ngaih tur thu a lo sawi tawh bawk.